PERTIWIN TITIANGE SEBET
Petengé ento, langité waluya kadi kain selem misi manik-manik sunar-sunar. Bintang-bintangé pakedipdip ring ambara, buka sedek ngintip guminé ané suba kenyel. Tiang negak di sisin tukadé ané pidan ening, sakéwala jani maliah mawarna abu. Anginé ngesisir di kuping tiangé, ngaba orti ané tusing taen kabaosang manusa "guminé sedek ngeling".
“Napi sané ngawinang Jeroné sedih kadi asapuniki?” pitaken tiang ring buana agung?.
Tuara ada pasaut, tuah munyin don-donan tuh ané aas ngabidang. Punyan-punyan kayuné ané wayah ngenah cara pecalang ané suba kélangan bayu. Di selag-selagan akahné, lulu plastiké makenyijib cara tatu ané tusing nyak seger.
Tiang inget dugas cenik. Tukadé ené pidan dadi suluh langit. Tiang ajak timpal-timpalé maplalianan yeh tusing jejeh kena daki. Kedis-kedisé teka semengan, ngendingang gendingan ané tusing taen telah. Jani, munyinne suba maganti aji gerung-gerung mesin ma boo andus.
Dugas petengé ento tiang ngipi.
Di ipian tiangé, guminé masiluman dadi anak lingsir istri masaput tanah miwah don-donan. Penyingakanidané ening kadi damuh, nanging pipinidané belus ulian yeh peningalan.
“Ibu tusing gedeg teken manusa,” baosdané alus, “ibu tuah kenyel ngiwasin loban manusané.”
“Napi sané prasida kalaksanayang titiang?” pitaken tiang ngejer.
“Piara ja ibu buka cening miara keneh ceningé,” pasautdané.
“Yening keneh ceningé daki ulian iri hati, guminé lakar milu usak. Yening keneh ceningé kedas ulian tresna asih, buanané lakar buin maangkihan.”
Tiang enten dugas suryané endag. Tukadé nu mawarna daki, nanging keneh tiangé tusing cara ibi. Tiang ngawitin uli unduk ané cenik: ngedasasin lulu di sisin tukadé, najuk sarwa punyan-punyanan di natah, ngajakin cerik-ceriké apang tresna teken yeh miwah tanah.
Anaké pada kedek ningalin liman tiangé daki tur maendut, nanging tiang marasa sedek ngedasin dewek tiangé padidi.
Sasih-kudang sasih suba liwat. Yeh tukadé sayan makelo sayan ening. Kedis-kedisé buin teka, ngendingang gendingan ané suba makelo ilang. Lan sabilang tiang matinjo langit peteng, tiang marasa guminé tusing buin sepi (keto ne kenehang)
Ida kenyem.
Jani tiang ngresep, guminé tusing ja tuah lima ané magarapan, kewale kenehe ne patut eling.
Nyaga buana patuh teken nyaga keneh suci.
Miara gumi pateh teken miara dewek.
Sawireh rikala pertiwine sebet, sujatiné keneh manusané sedek engsap carané nresnain.