Kehanan alas palané ring Sangéh sandéné punika sawatara dauh tiga nyoréang, ramé pisan olih sapangrauh para wisatawan mancanegara lan domestiké. Napi malih suryané sampun sayan séndéh ngauhang, satmaka lawat guminé sayan nglanduhang, tur kawéntenan alas palané katon sampun marawat saru, Nongcrétané saling tanggurin kadi matembang semarandana ngangenin ulun angen.Nika makawinan Alas Palané katon asri tur landuh, karentebin olih taruné ageng - ageng sané maégol - égolan muncuk donnyané ri tatkala kampehang angin ngasirsir , waluya kadi nitahang wong lén nganampekin pacang mararian irika. Sakéwanten bojogé makejang nu maplalian nyandénin para torisé sané melali irika. Bojogé ané truna maglayutan dikayuné. Ada nyuksik bulu ngalih kutun timpalné. Ada masih ané iteh manyoyoin panakné. Di jaban purané torisé magenti motrék bojog. Maidehan ia ngentungang kacang tekén biu. Bojogé sané ngamah kacang suuna tekén torisé.Tiang merasa nyeb nyingakin, sawireh suba sinah bojogé sing taén manjus.Selegenti bojogé menék negakin sirah torisé. Bas iteha torisé mapotrék sagét panakné nyerit ngeling. Kaca matané blaibanga tekén bojogé.Ditu lantas bojogé sabata aji wohwohan tekén gaidé. sawiréh yén sampun bek limané misi buah sinah kacané lakar kaentungang. Nanging bojogé iteh mlaibang kaca mata panak tirisé.Sampun makelo mara kacané entunganga.Bojogé mangkin sampun duweg ngalih amah uli aluh,Bojogé demen gati nyemak barang wisatawané apang nyak tukarina aji buah-buahan yadin buka kéto torisé tusing takut melli ke Sangéh. Torisé merasa demen gati gandongina tekén bojogé. Tiosan ring punika ditengah alas palané punika taler wénten pura ané kalintang asri. Raab purané makejang tekepina antuk jaring. tatujoné mangda nénten raabé besbesa tekén bojogé. Pamangkuné siaga makemit di Pura. Dané jero mangku ngayahin pamedeké ané ngaturang bakti, sambilanga malila cita irika.
Katon irika ring wantilané sisi kauh , wénten toris truna , pangadegnyané tegeh, bokné putih masawang coklat, bola paningalané masawang pelung, wiakti apekik gobanné, sedeng iteh ipun ngatonang kawéntenan alasé, sinambi malinggih ring bataran wantilan sané ring sampingnyané akéh makacakan dagang jegég sané matanja solf drink, snek miwah kuwud. Minab sakéng kaliwat lesunipuné, sambilanga malinggih ring bataran wantilan purané, ipun taler najuhang batisnyané, tur matolihan kipek kangin kauh sada mankenyem manis sareng dagang – dagang bajang ané ada milehan ring sisin – sisin wantilané.Yén inargamayang waluya kasiratin tirta sajiwani rasané, makesieng………….sieng.......sieng..... keto rasané maan sledétan lan kenyung manis bibih tipisipunné, sada pakeletug tangkah bajang – bajangé irika, napi malih dagangé ané ada disampingipunné negak, jeg cara ibuk paling tingkahnyané mangda polih ngenemin toris anom punika. Silih sinunggil dagang jegég gegésonan tindakannyané nganampekin i toris, sada matanja ngetohang kenyung manis bibih tipisnyané, sinambi ngrayu toris anom nika. Hallo mister………. solf drink mister, ……..please !!! or kuwud ? your like kuwud mister ?. Kénten raosnyané i dagang jegég, ngadokang basa Inggris pasarané. Toris anom nika wantah makenyem manis kémanten sinambi nuunang tas ransel tanginnyané saking tundunnyané , tur nyautin sada alon , thank you…………I have alredy Drink !. Oh…..sorry …….sorry Mister, kéto i dagang jegeg gelis muputang raos ipuné Bééééh ............méndahan laksanan bojog miwah dagangé ditu.
SUMBER BUKU PAKET BASA BALI
https://drive.google.com/file/d/1huj6eVBpaMh1TZFsinbChNifmR0symSn/view?usp=sharing
0 Komentar