KASUSASTRAAN BALI SECARA UMUM

KASUSASTRAAN Secara Umum dan Kasusastraan Bali Purwa

 

1.         Pamiteges Kasusastraan Bali

Parinama kasusaatraan bali puniki kasusun antuk kruna SU  ( luih , becik ) , SASTRA     ( ajaan , piteket , pawarah , kaweruhan ), tur polih wewehan jangkep(konfiks) ka - an. Kasusastraan yening selehin  makawit saking basa sansekerta inggih punika SASTRA. Sastra mateges Sas sane mearti nyukat-nyikut wiadin ngukur (mengukur), tra artinné piranti (serana/alat). Sastra inggih punika sajeroning piranti ngajahin tatwa utawi kaweruhan (ilmu). Susastra teges-ipun daging sesuratan sane becik /utama. Kasusastran Bali dados artin ipun soroh sarwa kaweruhan ane lintang luwih , becik sane medal saking budi utawi herdaya  Sang Kawiswara malarapan antuk pawisik (ilham/wahyu) sane kaiket  olih  basa utawi aksara sane lengut.Kalengutannyane punika marupa:

Gancaran/kakawian sane nenten kaiket utawi ketah kabaos prosa,

Tembang (kakawian sane kaiket uer-uger utawi ketah kabaos puisi,

Palawakia kekawian sane kaiket uger-uger sesuratan, sakemaon rikalaning ngwacen patut katembangang, puniki ketah kabaos prosa liris.

 

2.         Tetujon Nyelehin Susastra Bali

Parajana Baliné mangkin sampun sumuyug ngamaosang program rajeg Bali. Yéning punika kapikayunin majanten pacang prasida karasayang mungguing nilai-nilai budaya miwah susastra Baliné patut kapikukuhang duaning Bali patut kawangun madasar wawasan budaya saha kasinarin antuk agama Hindu. Yéning susastra Baliné prasida kapikukuhang majanten pacang prasida taler mikukuhang budaya Baliné. Budaya Bali sané rajeg pacang prasida ngawerdiang pariwisata Baliné, duaning Bali nginggilang wisata budaya. Maiketan ring punika, prasida katurang tetujon mlajahin utawi nyelehin kasusastran Baliné kadi ring sor puniki.

a.       mangda sida nguningin nilai-nilai budaya adiluhung sané pacang mawiguna pinaka sarana sajeroning nglimbakang budaya Baliné.

b.       mangda wénten anggén tetimbang midabdabin kabudayan Baliné sajero-ning ngarepin aab jagaté mangkin.

c.       Kanggén nincapang rasa bangga druéna makrama Bali

d.       kanggén buatan nincapang seni, ilén-ilén, miwah unén-unén ring Bali mangda prasida ngamolihang daging-daging tatwa agama saha nincapang sradha bhaktiné sajeroning ngrajegang agama Hindu Baliné.

 

2.         Jimbar Kekuub Kesusastraan Bali

Rauh mangkin paindikan jimbar kakuub kasusastran Baliné kantun marma utawi durung prasida kapastikayang. Yéning uratiang saking basa sané kanggén nyurat utawi maosang susastra punika wénten nganggén basa Bali, basa Kawi (Jawa Kuna), taler wénten nganggén basa Bali Tengahan utawi Jawi Tengahan.

Yéning uratiang saking masa kawéntenannyané, kasusastran Balin kapah dados kalih soroh, luiripun: (1) Susastra Bali Purwa (sastra tradisional) miwah (2) Susastra Bali Anyar (sastra modern). Susastra Bali Purwa malih kapah dados: (a) gancaran, (b) palawakia, miwah (c) tembang; Susastra Bali anyar taler kapah dados kalih: (a) prosa gancaran anyar (b) puisi Bali Bali Anyar

Yéning selehin saking tatacara nglimbakang utawi tatakrama mlajahin susastra punika, kasusastran Baliné taler kapah dados kekalih, inggih punika: (1) susastra tutur (sastra lisan), miwah (2) susastra sasuratan (sastra tulis). Sané ngranjing ring kasusastran tutur luiripun: (a) gegendingan, (b) satua-satua, (c) paribasa Bali. Sané ngranjing ring sastra sasuratan minakadi: (1) Sané mawangun tembang (geguritan, kidung, kakawin) (2) Mawangun Puisi Bali anyar, (3) Sané mawangun gancaran utawi fiksi (cerpen, novel, miwah drama).Yening selehin manut wangunnyane wenten mawangun gancaran/Prosa lan Puisi. Gancaran/Prosa wenten prosa bali Purwalan wenten Bali Anyar, Puisi taler wenten Puisi Purwa/ Tembang Lan Puisi Bali Anyar.

 

Kasusastraan Bali Purwa

Kasusastraan  Bali Purwa kapastika kasusastraan sane pinih riin wenten ring Bali, Lumbrahnyane nenten ja sane kasurat kemanten, wenten taler sane satata karambang, kapalang, turun temurun rauh mangkin. Cihna gumanti saking riin sampun  wenten kasusastraan , munggah sajeroning prasasti Desa Trunyan, tahun Isaka 833 utawi 911 masehi. Prasasti inucap kasurat antuk aksara Dewanagari saha ngangge Basa Bali Kuna. Lianan ring basa Bali Kuna, Kasusastraan Bali Purwa wenten sane nganggen Basa Sansekerta, Jawa Kuna, Kawi Bali. Indik wangun kasusastraan Bali Purwa wenten Marupa:

1.      Gancaran : kekawian bebas tan kaiket antuk uger-uger. Sekadi: satua-satua, conto ipun: satua isiap selem, Pan Belog, Bawang teken I Kesuna, Pan Balang Tamak, msl. Babad, conto ipun: Babad Dalem, Babad Pasek, Babad Pande, msl. Wenten marupa kanda luire: Kanda Pat Bhuta, Kanda Pat Rare, Kanda Pat Dewa, Kanda Pat Sari, marupa Itihasa, contoipun, Adiparwa, Sahaba Parwa, Udyoga Parwa, msl.

 

2.      Tembang : kekawian sane kaiket antuk uger-uger. Tembang sajeroning kasusastraan Bali Purwa, Wangunnyane kepah dados petang (4) soroh luire:

a.      Sekar Agung (Kekawin)

Kekawin utawi Tembang Gede utawi Sekar Agung utawi Wirama inggih punika kakawian utawi karangan sane kawangun antuk wirama. Conto kakawin:

·        Kekawin Ramayana olih Empu Yogi Swara.

·        Kekawin Bharata Yudha olih Empu Sedah miwah Empu Panuluh.

·        Kekawin Arjuna Wiwaha olih Empu Kanwa.

·        Kekawin Sutasoma olih Empu Tantular.

·        Kekawin Siwaratri Kalpa olih Empu Tanakung.

·        Kekawin Semarandhana olih Empu Darmaja.

·        Kekawin Gatotkaca Sraya olih Empu Panuluh.

·        Kekawin Writtasancaya olih Empu Tanakung.

·        Kekawin Negarakethagama olih Empu Prapanca.

·        Kekawin Kresnayana olih Empu Triguna, miwah sane lianan.

Kekawin ngangge Basa Jawa Kuna, tur kawangun antuk  wirama. Wenten  makudang-kudang wirama sakadi: Sronca, Basantilaka, Totaka, Rajani, Mandamalon, msl. Ketahnyane wirama sane apada 1(bait) kawangun antuk petang (4) carik. Carik kapertama kawastanin pangawit, carik kaping kalih pangenter /mingsalah,carik kaping tiga pangumbang, carik kaping pat kawastanin pamada. Wenten sane apada madaging tigang carik punika kawastanin Rahi-tiga utawi Utgata Wisama, nenten madaging carik pangenter. Uger-uger sane ngiket kakawin luire : guru, laghu,wretta lan matra.

Guru mateges suara dirgha (panjang). Suara guru kasurat antuk ceciren ---. Suara guru wenten tetiga 3 luire, Guru hraswa (guru bawak), Guru dirgha (guru panjang) Guru Pluta (guru panjang tur ngileg).

Sane ngranjing ring suara guru luire:

-          Sekancan wanda utawi kecap masauara panjang.

-          Sekancan kecap sane matengenan

-          Sekancan kecap ring ajeng nania, guung, lan suku kembung.

-          Sekancan wanda ring kecape ring ajeng madwita.

Laghu mateges suara hrswa (bawak/cutet) kasurat antuk 0/u , wretta mateges katah wilangan wanda sane acarik (sagatra), miwah matra mateges genah guru laghu sajeroning acarik (sagatra).

Conto wirama:

wirom:

sÙenÑwi.

pÉih)nÓm)nÒ(mßaumrx*srot/,

srogs*soausierktUtn,

tn(qtnÐompiedonêtnê],

y]kÓis*sjéna(mßrk×k             >

wretta        : 12 wanda

matra         : o-o/--o/ooo/-o-

 

b.      Sekar Madia (Kidung)

Kidung ketahnyane ngangge Basa Jawi tengahan, wangunnyane kaciriang antuk  kalih pada pertama kawastanin kawitan, kalih pada selantur ipun mawasta pamawak, kapuput malih kalih pada antuk panawa( tembang panjang). Asapunika selantur ipun jantos puput apaletan carita.

Kidung kabanda antuk pada lingsa nanging, sajeroning ririgannyane nenten ngangge carik. Duaning rikala makakidungan sang angidung nenten mararian yadian pada lingsanyanesampun nepek, tur labuh lingsannyane kadadosang nyutetang kruna.

Conto ipun: kidung wargasari, kidung tantri, kidung Panji Malat Rasmi, Kidung Kundangdea, Kidung Wang bang Wideya, Kidung Rangga Lawe, Kidung Manukaba, miwah sane lianan.

c.       Sekar Alit / Pupuh/ Macapat

Tembang Baline sane mawasta sekar alit sering taler kabaos tembang macapat utawi pupuh. Pupuh-pupuhe puniki kabanda antuk uger-uger padalingsa.

-          Padalingsa tegesnyane akeh acarik ring apada, akeh kecap utawi wanda sajeroning acarik. Miwah wangun labuh suara ring panguntat sajeroning acarik.

-          Uger-uger akeh carik ring apada kawastanin guru gatra.

-          Uger-uger akecap sejeroning acarik kawastanin guru wilang.

-          Uger-uger labuh suara ring anguntat acarik kawastanin guru dingdong.

Uger-uger makadai guru gatra, guru wilang, miwah guru dingdong punki patut kauningin antuk sapa sira ugi sane mlajahin sekar alit. Duaning, yening iwang ngambil ring guru wilang tembange pacang kawastanin ngelung. Yening iwang ring guru dingdong, tembange pacang kabaos ngandang.

Sajeroning Lontar Gitasancaya wenten 42 pupuh. Sakewanten sane lumrah ring bali wantah dasa (10)  soroh luire: Sinom, semarandana, Mijil, Maskumambang, Pangkur, Pucung, Ginada, Ginanti, Dangdang Gula lan Durma.

Ring Sor puniki kaaturang padalingsa makudang-kudang pupuh:

Pupuh	Akeh wanda saceroning acarik, lan akeh carik risejeroning apada
	1	2	3	4	5	6	7	8	9	10
Sinom	8a	8i	8a	8i	8i	8u	8a	8i	4u	8a
Semarandana	8i	8a	8o	8a	8a	8u	8a
Ginada	8a	8i	8a	8u	8a	4i	8a
Ginanti	8u	8i	8a	8i	8a	8i
Durma	12a	8i	6a	8a	8i	5a	8i
Dangdang	10i	10a	8e	8u	8i	8a	6u	8a	12i	8a
Maskumambang	4a	8i	6a	8i	8a
Mijil	10i	6a	4e	10e	8i	6i	8u
Pangkur	8a	11i	8u	8a	12u	8a	8i
Pucung	4u	8u	6a	8i	12a

 Tata cara melajahin tembang sekar alit utawi macapat wenten kalih inggih punika kabaos paca paliring miwah nyengkok wilet. Paca paliring mateges nembang manut grantangan sane kantun polos nenten nganggen wiletan, nyengkok meweh gregel. Nyengkok wilet mateges nembang sane sampun nganggen papayasan marupa cengkok wewiletan miwah gregel.

Sajeroning nembang macapat suarane magenah ring tungtungin lidah. Punika mawinan kabaos sekar alit. Suarane magenah ring sisi, manis, jangih, saha nganutin sane kabaos guru dingdong inggih punika nembang sane olah-olahan suarane bebas nanging dingdong panguntat carik mangda pastika manut pacap liring sane kajantenang. Indik Kawagedan matembang pupuh wenten patpat paindikan sane katureksa sajeroning lomba ngwacen sekar alit inggih punika:

a.       Tikas ngeninin indik abah utawi tata busana

b.      Onek-onekan ngeninin indik kapatutan ngawacen

c.       Reng suara ngeninin indik suara sane jangih nudut kayun

d.      Guru dingdong ngeniinin indik kapatutan suara panguntat carik.

Pupulaning makudang-kudang pupuh sane nyeritayang silih sinunggil carita kawastanin geguritan. Geguritan ngawit karipta daweg pamadegan para agunge ring Puri Klungkung sawatara abad 17. Makeh pisan geguritan sane prasida karipta minakadi:

1.      Geguritan Basur nganggen Ginada Basur antuk Ki Dalang Tangsub

2.      Geguritan Sampik-Ingtai, matembang campuran antuk Ida Ketut Sari

3.      Geguritan Jaya Prana nganggen pupuh Ginada, antuk I Ketut Putra

4.      Geguritan Sucita Subudi, nganggen macepa campuran antuk Ida Bagus Ketut Jelantik

5.      Geguritan Tamtam, nganggen tembang campuran, antuk Ketut Sangging

6.      Geguritan lianan sakadi: Salya, Cangak, Sarasamuscaya, Lokika, Dukuh Siladri, Kawiswara, Gunawati, RajaPala, Pan Balang Tamak,Linggar Petak, miwah sane tiosan.

Geguritan sane ngangge pupuh asiki saking pangawit ngantos puput kawastanin Geguritan monometris,  sakadi Geguritan Basur, Geguritan Jaya Prana ngangge pupuh ginada, peparikan Salya nganggo pupuh sinom. Geguritan Sane ngangge makudang-kudang soroh pupuh kawastanin geguritan polimetris, sakadi Geguritan Sucita, Geguritan Lutung mungil, Geguritan Sampik Ingtay, Geguritan Cangak, msl.

 

d.      Sekar Rare (gegendingan)

Gegendingan kanggeng rikalaning ngarum-rum rare, anak alit utawi bayi mangda nenten rewel mangda degeng saha gelis sirep. Gegendingan Bali sampun wenten saking  nguni pisan saha nenten madue uger-uger sane pasti. Gegendingan makanten polos, nganggen kruna-kruna basa Bali lumrah. Wangunnyane masaih ring pantun sajeroning susastra Melayu Kuna sane nyinahang wenten giing ‘ampiran’ miwah daging ‘isi’ akeh wenten gegendingan sane nenten maderbe murda (judul).

1. Gending Rare

Dumun, gending rare kanggen nyihnayang rasa seneng alit-alite ring kala maplalian. Sane ngranjing ring gending rare; luir ipun: Guak maling Taluh,Ongkek-ongke, meong-meong, Juru pencar, Ratu Anom, Made Cenik, Jenggon Uban, miwah sane lianan.

2. Gending Janger

Gending Janger puniki madaging tatuek hiburan ring alit-alite miwah ring para yowanane, gending janger inggih punika saluir gegendingan sane kanggen unen-unen sane mawasta janger kecak. Gending janger nganggen basa Bali lumrah sane ngawetuang pikayun seneng, girang, miwah ulangun. Ungkuran puniki, gending janger sering kaanggen ring magagenjekan. Gending janger puniki anut pisan kagendingang nganggen iringan gambelan Bali. Sane ngranjing ring gending janger minakadi: Don dapdape, Bungan seruni, Galang Bulan, Beli Bagus, miwah sane lianan.

3. Gending Sanghyang

Gending sanghyang kagendingang rikala nedunang sanghyang. Imen-men sane banget katengetang krama baline. Sekadi: sanghyang dedari, sang hyang jaran, sang hyang memedi, msl.

Conto gending sanghyang upami: Dewa ayu, Kukus arum, Suaran Kumbag, Sekar Gadung, Sekar Emas, miwah sane lianan. Tios ring wangun ring ajeng, kasusastraan bali purwa wenten marupa paribasa bali.

3. Palawakia : inggih punika Kekawian bebas sane nenten kaiket antuk uger-uger, nagnging rikala ngwacen sekadi mawirama. Sekadi ngwacen parwa-parwa, babad, putru, tutur, miwah sane siaosan. Sastra puniki makehan ngangge Basa Jawi kuna utawi Jawi Tengahan.