BELAJAR WIDYA BASA 1

 

 

 

 

 

 

 

PENDALAMAN MATERI BAHASA BALI MODUL 1 PURWAKA WIDYA BASA

KEGIATAN BELAJAR 1 BASA BALI PINAKA WIDIA

 

 

 

 

 

 

 

 

Penulis

I Wayan Gede Wisnu, S.S., M.Si.

 

 

 

 

 

 

 

 

 

 

 

 

 

KEMENTERIAN PENDIDIKAN DAN KEBUDAYAAN 2019

 

 

DAFTAR ISI

Cover.......................................................................................................... i

Daftar isi..................................................................................................... ii

Kegiatan Belajar 1 Bahasa Bali Pinaka Widya..................................... 1

A.     Pendahuluan....................................................................................... 1

·         Definisi singkat..................................................................................... 1

·         Relevansi.............................................................................................. 2

·         Panduan Belajar.................................................................................... 2

B.     Inti........................................................................................................ 3

·         Capaian Pembelajaran.......................................................................... 3

·         Sub Capaian Pembelajaran................................................................... 3

·         Uraian Materi........................................................................................ 3

·         Contoh/Non-contoh/ilustrasi................................................................ 22

·         Forum diskusi....................................................................................... 22

C.     Panutup............................................................................................... 23

·         Rangkuman........................................................................................... 23

·         Tes Formatif......................................................................................... 23

·         Daftar Pustaka...................................................................................... 26

 

 

 

 

 

SEBEUMNYA SAYA MOHON MAAF INI SAYA UNGGAH BE AGAR SAYA BISA BELAJAR ONLINE UNTUK DIRI SAYA DAN REKAN-RKAN SAYA, TERIMAKASIH

A.       Pendahuluan

·         Deskripsi Singkat

 

Kegiatan Belajar 1 Basa Bali Pinaka Widia

Parikrama pamalajahan basa Bali sajeroning pendidikan formal sakadi mamargi ring sekolah sampun prasida kalaksanayang saking riin kantos mangkin. Sajeroning parikrama pamalajahan inucap pastika ngamedalang makudang- kudang pikobet sakadi karasayang antuk para guru sajeroning parindikan kasuksman tata basa. Punika ngawinang wenten para guru sane meweh nyawis pitaken-pitaken sajeroning kasuksman widya basa. Pitaken punika akehan marupa pitaken-pitaken pepojolan (dasar), minakadi; (1) Napi sujatine widya basa punika?

(2)   Napi kasukseman basa punika? miwah (3) Sapunapi basa punika kapolihang? Kawentenan pitaken-pitaken sakadi punika ketahnyane nyantenang indik ceciren basa pinaka widya, panampen para sujana indik basa, kasukseman basa, utsaha ngamolihang basa, linggih miwah kawigunan basa, saha warna basa. Parindikan sakadi punika salanturnyane kadadosang pinaka unteng peplajahan sajeroning modul kapertama sane jagi kapalajahin puniki.

Unteng peplajahan sakadi kabahbahang ring ajeng prasida kapalih dados tigang bebaosan saha nglantur ring parikrama pamlajahannyane. Kawentenan bebaosan punika prasida kajantenang sakadi ring sor puniki.

1.             Basa pinaka widya.

2.             Pahan miwah wewidangan widya basa.

3.             Panampen-panampen sajeroning widya basa.

Ri sampune majanten uning sajeroning unteng peplajahan ring ajeng, salanturnyane para pamilet PPG kapisaratang mangda prasida (1) nyantenang ceciren basa Bali pinaka widya sane patut kapalajahin, (2) nlatarang pepalihan wewidangan sajeroning widya basa, (3) nyandingang makudang-kudang panampen saking para sujana widya basa indik kasujatian widya basa, (4) mahbahang kasukseman sajeroning basa, (5) nyutetang sapolah-palih utsaha ngamolihang basa, (6) mahbahang basa Bali Kuna kantos Basa Bali Kepara, (7) nyantenang linggih basa Bali, (8) nyantenang basa Bali pinaka basa daerah, (9)

 

 

nyantenang medalnyane warna basa Bali, miwah (10) minayang makudang- kudang soroh warna basa manut wewidangannyane, tata cara, saha gaya. Kawentenan punika mabuat pisan ring para gurune ri kala ngamargiang pamalajahan basa Bali ring sekolah.

Inggih para pamilet PPG basa Bali, durusang margiang pepalajahannyane! Dumogi prasida ngresepang pangweruhan sane katelatarang sajeroning unteng peplajahan inucap. Salanturnyane, pikolih peplajahan puniki prasida kaanggen agem-ageman pinaka guru basa Bali sane sujana saha profesional.

 

·         Relevansi

Pamlajahan indik basa Bali pinaka widya puniki mapaiketan ring kaweruhan sajeroning kawentenan basa Bali pinaka sinalih tunggil widya miwah kekuwubnyane manut panempen saking para sujana basa. Paiketan inucap prasida kajantenang sajeroning pelajahan indik: (1) pawiwit saha panglimbak widya basa,

(2)  wangun-wangun sajeroning widya basa, miwah (3) panureksan sajeroning wangun-wangun widya basa. Wangun peplajahan inucap dahat mabuat pinaka pangawit sajeroning pamlajahan indik widya basa sadurung nglimbak ring wewidangan salanturnyane.

 

·         Panduan Belajar

Para pamilet PPG kapisaratang mangda urati ri kala malajahin sadaging peplajahan puniki turmaning ngraris prasida tatas ring bebantangan peplajahan sakadi ring ajeng. Wenten makudang-kudang pangweruhan indik widya basa sane patut kapolihang sadurung guru basa Bali ngamargiang peplajahan ring kelas. Kaweruhan punika prasida kaanggen agem-ageman sajeroning ngwangun pangrancana peplajahan sakadi Rencana Pelaksanaan Pembelajaran (RPP). Mapaiketan ring parindikane punika, wenten polah-palih sajeroning pamalajahan indik widya basa inucap sakadi ring sor puniki.

1)             Ngresepang dumun ceciren pamikukuh basa pinaka widya  (indik bebaos, unteng pamineh, miwah tata cara).

 

 

2)             Ngrereh miwah nyelehin ceciren punika sajeroning makudang-kudang tetilikan indik basa Bali.

3)             Ngresepang unteng peplajahan ngawit saking kapertama kantos kaping pat.

4)             Ngamolihang kaweruhan sane mabuat sajeroning peplajahan puniki.

5)             Mligbagang pakewuh sane kapolihang sajeroning peplajahan puniki saha salanturnyane kabligbagang sareng pangampu/intstruktur.

 

B.        Inti

·         Capaian Pembelajaran

Menguasai materi ajar bidang studi bahasa Bali di sekolah dasar dan menengah yang mencakup: (1) struktur bahasa Bali, (2) keterampilan berbahasa lisan dan tulis, (3) sastra Bali klasik dan modern, (4) kosakata dan idiom bahasa Bali, (5) aksara Bali, dan (6) budaya Bali; termasuk advance material secara bermakna yang dapat menjelaskan aspek “apa” (konten), “mengapa” (filosofi), dan “bagaimana” (penerapan dalam kehidupan sehari-hari).

 

·         Sub Capaian Pembelajaran

Menganalisis prinsip struktur bahasa Bali dan aplikasinya dalam pembelajaran bahasa Bali (bahasa Bali pinaka widya).

 

·           Uraian Materi

1.         Basa Pinaka Widya

Ri kala jagi malajahin indik basa sajeroning i manusa, iraga prasida nilikin sane kabaos “kautaman manusa”. Kasengguh “utama” santukan prasida nyantenang pabinayan sajeroning tata cita (manah) kalawan sarwa urip ring mercapada. Kauripan manusa sarahina nenten prasida lempas ring geginan sajeroning mabasa, sakadi mamargi ring kulawarga, bebanjaran, desa pakraman, sekolah, miwah ring sakancan genah ngamargiang swagina. Ring sawewidangan inucap pastika pacang wenten sesambatan pantaraning parajana sane mapiranti antuk basa. Kahanan sakadi punika prasida nyantenang maka sujatine iraga

 

 

sampun jenek ring sawewengkon jagat sane kabaos basa. Iriki wenten bebaosan sane kalaksanayang antuk masadu ajeng, wenten taler sane nganggen telepon, miwah wenten sane kalantarang antuk piranti anyar sakadi mangkin, marupa: SMS, BBM, WA, saha Facebook. Dadosnyane, nenten ja wenten geginan sajeroning kauripan manusa sane lempas saking kruna, adiapin ri kala i manusa sedek nyumpena. Kawentenane punika nyantenang linggih basa sajeroning kauripan manusa wantah dahat mautama. Tiosan pinaka sarana mabebaosan, kawentenan basa puniki prasida minayang i manusa kalawan sarwa sato. Yening wenten arsa jagi malajahin indik sapunapi tata titi miwah parikrama ring silih tunggil desa pakraman, iraga prasida “uning” sangkaning basa sane kaanggen antuk para krama sawewidangannyane. Puniki pinaka piteges indik basa pinaka pangawit kautaman manusa. Sane dados pitaken, “Napi ke punika kasukseman “uning” sajroning basa?

Yening para pamilet “uning” ring basa, pastika pacang prasida mabebaosan miwah ngresepang ring bebaosan anak tiosan. Indike puniki prasida nyantenang kawentenan i manusa sane sampun maduwe indria pinaka piranti ngamedalang wangun-wangun bebaosan basa sane janten pitegesnyane saha prasida pacang nampenin (menginterpretasi) bebaosan sane kamedalang antuk anak tiosan (Fromkin& Rodman, 1988). Dadosnyane, anake sane kasengguh “uning” ring basa pastika prasida ngamedalang wangun-wangun bebaosan basa Bali sane sampun majanten tegesnyane saha prasida nampenin (menginterpretasi) wangun- wangun bebaosan (basa Bali) sane kamedalang antuk anak tiosan. Anake sane sakadi inucap patut maduwe dasar pangweruhan indik basa Bali miwah kawagedan nganggen basa Bali.

Widyabasa, utawi kabaos linguistik sajeroning basa Indonesia, kakukuhang saha kaangkenin pinaka widya sane mandiri (ngadeg ngraga pinaka widya) sujatinyane wawu kapastikayang ring pangawit abad ke-20. Parindikan puniki kajantenang ri sampune medal buku saking Ferdinand de Saussure sane mamurda Course de Linguistic Generale (1916) miwah buku E. Sapir sane mamurda Language, An Introduction to Society to Study of Speech (1921). Panglimbaknyane sayan nincap sesampune medal buku saking Leonard

 

 

Bloomfield Language (1933). Parinama linguistik pinih rihin kamedalang duk warsa 1808 sajeroning majalah ilmiah sane katureksa antuk Johann Severin Vater miwah Fredrich Justin Bertuch. Manut Bloomfield (1933), widya basa pinaka widya tan bina sakadi matematika, fisika, miwah kimia, sakewanten objek (indik bebaosan) sane kaanggen inggih punika marupa basa.

Widya basa ngranjing pinaka widya empiris sane kadasarin antuk pikolih praktyasa sajeroning data. Pinaka widya sane kadasarin antuk data inucap, pikolih tetilikan widya basa dahat objektif (manut kasujatianyane) saha prasida katureksa (katerima utawi katungkasin) malih antuk panilik sane tiosan. Punika mawinan, sajeroning tetilikan widyabasa dahat kabuatang data sane jangkep.

Pinaka widya, widya basa taler maduwe objek (indik bebaosan) sane sinah saha janten, inggih punika basa utawi pah-pahan basa. Kawentenan pah-pahan puniki sujatine akeh pisan. Punika ngawinang panilik basa sane wikan nenten naenin pacang kakirangan indik bebaosannyane. Sakadi katah sajeroning widya- widya sane tiosan, pinaka motivasi (pisarat) para panilik basa inggih punika rasa meled uning “rasa edot nawang” sajeroning maosang indik basa saha pah- pahannyane. Pah-pahan basa punika satata ngawinang meled jagi kabaosang saha katuekang malih turmaning nenten surud-surud jagi kabligbagang. Imbanyane, napi ke kasujatian basa? Napi ke gunane? Napi kemanten pah-pahan sane ngwangun? Napike wenten uger-uger sajeroning basa punika? saha sapunapi wangun uger-uger punika?

Yening uratiang saking bahbahan ring ajeng, tetilikan indik basa sujatine sampun sue kamargiang. Punika ngawinang akeh sampun wenten pikolih sane prasida kadadosang teori (tata manah/dasar manah/dasar tetimbang) pinaka dasar ngamanahin basa sane prasida katerima antuk sakancan basa ring sajebag jagate. Samaliha, teori inucap prasida kadadosang gegambelan pangawit ri kala jagi nilikin basa saha pah-pahanyane. Pinaka imba, panampen yening basa pinaka tata pralambang suara sane sesukan; yening basa punika angkepan wangun,  teges, saha kahanan; panampen indik basa sane maduwe uger-uger sane ngenter basa punika. Makasami punika --- miwah kantun akeh malih -- prasida kawigunayang pinaka dasar tetimbang sane prasida kadadosang panuntun rihin sajeroning nilikin

 

 

basa miwah pah-pahanyane. Madasar antuk mraktiaksayang data basa miwah pah- pahanyane taler kajangkepin antuk dasar tetimbang, salanturnyane prasida kasusun hipotesis (tetarka) rihin sadurung ngrancang pitaken-pitaken sane pacang kabligbagan.

Yening kacutetang panlataran peplajahan sakadi ring ajeng, salanturnyane prasida kapitegesin tetiga parindikan sane ngukuhang widya basa pinaka widya sakadi ring sor.

1)                 objek (indik bebaosan) utawi parindikan sane kabaosang inggih punika sujati indik pah-pahan basa manusa, sakadi bebaosan utawi sesuratan (boya ja basa gegaenan saha boya ja basa sarwa sato);

2)                  teori (dasar manah/dasar tetimbang) indik basa sane sampun ketah; miwah

3)                  hipotesis (tetarka) sajeroning ngenterang tetilikan (Subroto,1992:12).

Sajabaning tiga parindikan sane ngukuhang widyabasa pinaka widya punika, wenten taler tetujon miwah parindikan sane mapaiketan ring metode (tatacara). Tetujon nilikin miwah malajahin basa inggih punika mahbahang pola- pola cara kerja (tatakarya), seseringan-seseringan sane pinih akeh saha runtut, miwah kawentenan uger-uger sane ngenterang basa punika. Sakancan pikolih sane prasida mahbahang saha nyinahang basa Bali miwah basa tiosan dahat kabuatang sajeroning ngwangun dasar tetimbang widya basa sane prasida kaanggen antuk basa-basa ring sajebag jagate. Tetujon iraga malajahin miwah nelebin widya basa taler mangda prasida ngamolihang wangun-wangun basa, nyantenang cecirennyane (aksara, wewehan, kruna, frase, klausa, lengkara, paragraf, wacana), paiketan pantaraning wangun-wangun punika kalawan wangun tiosan, miwah kawigunan wangun basa sajeroning ngardi wangun-wangun basa salanturnyane.

Tata cara sajeroning widya basa matetujon pinaka panuntun pamargi panilik utawi pamalajah basa napi ke tetarkannyane patut (katerima) utawi iwang (katulak). Sajabaning punika, prasida taler kaanggen nuntunin panilik mangda ngamolihang tetujon sajeroning tetilikannyane (Sudaryanto, 1988). Tata cara taler prasida kabaosang pinaka sakancan pamargi sane kalaksanayang saking mikayunin, nuekang indik bebaosan, nyantenang dasar manah, mratiaksayang

 

 

kawentenan bebaosan utawi wangun basa sane kaanggen, nyantenang data saha parikrama ngamolihang, instrument (piranti pamupul data), miwah nureksain saha nyelehin data kantos ring parikrama mupulang pikolih-pikolih  sajeroning tetilikan. Sane patut kaelingang, tata cara sajeroning tetilikan widya basa sahasa kapaiketang ring teori linguistik tertentu (jejantenan dasar manah widya basa), sakadi dasar manah utawi dasar tetimbang widya basa anyar sane nglimbak pungkuran puniki, pantarannyane aliran strukturalisme, aliran fungsional, aliran generative-transformatif, aliran tagmemik miwah sane lianan. Ring sor puniki wenten pinaka imba sane marupa abstrak tulisan ilmiah (kuub sesuratan mamidya) saking makudang-kudang pikolih tetilikan sane nyantenang widya basa pinaka widya sane prasida ngadeg ngraga.

 

·         Contoh

Imba Abstrak 1:

Tetilikan puniki matetujon 1) nelatarang kawentenan pahan basita paribasa nganggen kruna-kruna sane mapaiketan sareng ayam ring Desa Tukadsumaga Kecamatan gerokgak, 2) nelatarang teges basita paribasa nganggen kruna-kruna sane mapaiketan sareng ayam ring Desa Tukadsumaga Kecamatan Gerokgak. Ring tetilikan puniki sane dados jejering tetilikan inggih punika kruna-kruna mapaiketan sareng ayam ring Desa Tukadsumaga Kecamatan Gerokgak miwah sane dados penandang ring tetilikan puniki inggih punika basita paribasa sane mapaiketan sareng ayam sane wenten ring Desa Tukadsumaga Kecamatan Gerokgak. Pamupulan data ring tetilikan puniki inggih punika nganggen kramaning observasi, kramaning sadu wicara miwah kramaning dokumentasi. Data sane sampun kapolihang selanturnyane katureksa nganutin tata caratureksa deskriptif kualitatif. Pikolih ring tetilikan puniki inggih punika, 1) kapolihang wenten tiga soroh pahan basita paribasa mapaiketan sareng  ayam sane wenten ring Desa Tukadsumaga, minakadi: sesenggakan wenten pitulikur (27), wewangsalan wententen solas (11), miwah raos ngempelin wenten siki (1). 2) teges saking samian basita paribasa sane kapolihang sami

 

 

madue tegesnyane, wenten kalih teges utama sane wenten irika, inggih punika nyantenang indik jaya miwah kaon ayam punika, miwah ayam sane becik miwah ayam sane nenten becik (Astina, dkk, 2016).

 

Imba Abstrak 2:

Tetilikan puniki matetujon nguningin indik (1) basita paribasa sane kaanggen sajeroning dolanan ring gong kebyar alit-alit duta Kabupaten Gianyar tahun 2014 (2) guna sarat paajah-ajah karakter sajeroning dolanan ring gong kebyar alit-alit duta kabupaten Gianyar warsa 2014 (3) pikenoh basita paribasa sajeroning dolanan ring gong kebyar alit-alit duta Kabupaten Gianyar warsa 2014 sareng pengajahan. Jejering tetilikan puniki dolanan ring gong kebyar alit-alit duta kabupaten Gianyar warsa 2014. Penandang tetilikan puniki basita paribasa sajeroning dolanan ring gong kebyar alit-alit duta kabupaten Gianyar warsa 2014 miwah guna sarat paajah-ajah karakter sajeroning dolanan ring gong kebyar alit-alit duta kabupaten Gianyar warsa 2014. Tetilik puniki nganggen palihan tetilik deskriptif kualitatif. Tetilik puniki nganggen kalih kramaning mupulang data inggih punika (1) kramaning transkripsi (2) kramaning dokumentasi. Data tureksa sane kaanggen minakadi: (1) identifikasi data (2) reduksi data (3) klasifikasi data

(4) deskripsi data (5) interpretasi data miwah (6) pamicutet. Pikolih ring tetilik puniki inggih punika (1) Basita paribasa sajeroning dolanan ring gong kebyar alit-alit duta kabupaten Gianyar warsa 2014 wenten lelima, minakadi: sesawangan; pepindan; wewangsalan; peparikan; miwah bebladbadan. (2) Guna sarat paajah-ajah karakter sajeroning dolanan ring gong kebyar alit-alit duta kabupaten Gianyar warsa 2014 wenten molas minakadi: parama tatwa (religius), arjawa (jujur), eling ring sesana (tanggung jawab), plapan (disiplin), seleg makarya (kerja keras), seleg mareragragan (kreatif), pikayun sane meled uning (rasa ingin tahu), demokratis, ngajiang kawijayan (menghargai prestasi), pasawitran (bersahabat/komunikatif), sarating sukerta (cinta damai), urati ring makrama   (peduli  sosial),  wira   negara   (bela  negara),  seneng  ngwacen

 

 

(gemar membaca), urati ring palemahan (pedulilingkungan). (3) Pikenoh basita paribasa sajeroning dolanan ring gong kebyar alit-alit dutaKabupaten Gianyar warsa 2014 sareng pengajahan inggih punika sesolahan dolanan marupa silih sinunggil piranti sane kanggen maosang indik kaweruhan utawi sastra ring jamane sakadi mangkin, kacingak saking sesolahan dolanan sane madaging basita paribasa sampun pastika madue paiketan sareng pangajahan santukan dolanan pinaka piranti sane kanggen maosang indik basita paribasa punika taler maosang indik sastra-satra sane lianan sane madue kawigunan majeng para kramane (Darmadi, dkk, 2015)

 

Imba Abstrak 3:

Tetilik puniki  matetujon  nelatarang (1) tata  wangun  intrinsik miwah

(2) guna sarat paguron-guron ring geguritan Dharma Sthiti kekawian I Made Menaka. Jejering ring tetilik puniki inggih punika marupa geguritan “Dharma Sthiti” kekawian I Made Menaka miwah Penandang ring tetilikan puniki inggih punika wangun miwah guna sarat paguron-guron. Ring tetilik puniki nganggen tetilik deskriptif kualitatif miwah mupulang datanyane kalaksanayang nganggen kramaning dokumentasi. Data tureksa sane kaanggen inggih punika deskriptif kualitatif, pah-pahannyane (1) reduksi data, (2) ngwedarang data (menyajikan data), (3) makarya panyutet (kesimpulan). Pikolih sane kapolihang (1) wangun intrinsik sane wenten ring geguritan “Dharma Sthiti” inggih punika, unteng (tema), lelintihan (plot/alur), desakala, patra (latar/setting), pragina (penokohan), sudutpandang (point of view), paribasa (gaya bahasa), pebesen/tetuek. (2) guna saratpaguron-guron sane wenten ring geguritan “Dharma Sthiti” kekawian I Made Menaka inggih punika sradha, jemet makarya, trena asih, urati ring krama, awiwahara miwah meled uning. Cutetnyane geguritan Dharma Sthiti puniki sampun kawangun olih wangun sane jangkep tur guna sarat paguron-guron sane kapanggihin mapaiketan sareng kawentenan miwah parilaksana masimakrama. Saking tetilik puniki kaaptiang majeng ring  krama  Bali  prasida  ngalestariang  budaya  miwah  kria  sastra  Bali

 

 

utaminyane geguritan, majeng sang pangwacen kaaptiang prasida ngicenin paweweh kaweruhan indik wangun intrinsik kria sastra miwah guna sarat paguron-guron sane wenten ring Geguritan Dharma Sthiti kekawian I Made Menaka miwah majeng panilik sane lianan mangda prasida kanggen pratiwimba ri kala makarya tetilikan sane kantun mapaiketan sareng tetilikan puniki (Suryati, Ari Ni Wayan, dkk, 2016)

 

Maduluran antuk tetiga imba abstrak tetilikan indik basa Bali ring ajeng, salanturnyane prasida kapolihang indik bebaosan utawi objek, tata cara utawi metode, miwah pikolih tetilikan sane kadasarin antuk dasar manah utawi teori. Ring imba abstrak sane kapertama, nyantenang objek indik basita paribasa sane mapaiketan ring ayam sane wenten sajeroning Desa Tukad Sumaga, Kecamatan Gerokgak. Metode sane kanggen inggih punika: kramaning observasi, kramaning sadu wicara, miwah kramaning dokumentasi. Pikolih ring tetilikan inucap, inggih punika: (1) kapolihang wenten tigang soroh pahan basita paribasa mapaiketan ring ayam sane wenten sajeroning Desa Tukad Sumaga, minakadi: sesenggakan wenten pitu likur, wewangsalan wenten solas, miwah raos ngempelin wenten asiki. (2) Kapolihang piteges saking wangun basita paribasa inucap sane nyantenang indik jaya saha kaon sajeroning ayam punika miwah ayam sane becik saha ayam sane nenten becik.

Ring imba abstrak kaping kalih, nyantenang objek indik basita paribasa sajeroning dolanan ring gong kebyar alit-alit duta kabupaten Gianyar warsa 2014 miwah guna sarat paajah-ajah karakter sajeroning dolanan ring gong kebyar alit- alit inucap. Tetilik puniki nganggen kekalih metode mupulang data, inggih  punika: (1) kramaning transkripsi miwah (2) kramaning dokumentasi. Pikolih ring tetilik inucap, inggih punika: (1) Basita paribasa sajeroning dolanan ring gong kebyar alit-alit duta kabupaten Gianyar warsa 2014 wenten lelima, minakadi: sesawangan; pepindan; wewangsalan; peparikan; lan bebladbadan. (2) Guna sarat paajah-ajah karakter sajeroning dolanan ring gong kebyar alit-alit duta kabupaten Gianyar warsa 2014 wenten limolas, minakadi: parama tatwa (religius), arjawa (jujur), eling ring sesana (tanggung jawab), plapan (disiplin), seleg makarya

 

 

(kerja keras), seleg mareragragan (kreatif), pikayun sane meled uning (rasa ingin tahu), demokratis, ngajiang kawijayan (menghargai prestasi), pasawitran (bersahabat/komunikatif), sarating sukerta (cinta damai), urati ring makrama (peduli sosial), wira negara (bela negara), seneng ngwacen (gemar membaca), urati ring palemahan (pedulilingkungan). (3) Pikenoh basita paribasa sajeroning dolanan ring gong kebyar alit-alit duta Kabupaten Gianyar warsa 2014 kalawan pengajahan inggih punika sesolahan dolanan marupa silih sinunggil piranti sane kanggen maosang indik kaweruhan utawi sastra ring aab jagate sakadi mangkin. Parindikane puniki prasida kacingak saking sesolahan dolanan sane madaging basita paribasa sampun pastika madue paiketan ring pangajahan santukan dolanan pinaka piranti sane kanggen maosang indik basita paribasa punika taler prasida maosang indik susatra lianan sane madue kawigunan majeng parajanane.

Ring imba abstrak kaping tiga, nyantenang objek indik wangun miwah guna sarat paguron-guron. Metode sane kaanggen inggih punika deskriptif kualitatif. parikrama mupulang data kalaksanayang antuk kramaning dokumentasi. Pikolih tetilikan inucap inggih punika: (1) wangun intrinsik sane wenten ring geguritan “Dharma Sthiti” marupa unteng (tema), lelintihan (plot/alur), desakala, patra (latar/setting), pragina (penokohan), sudutpandang (point of view), paribasa (gaya bahasa), pebesen/ tetuek. (2) Guna sarat paguron-guron sane wenten ring geguritan “Dharma Sthiti” kekawian I Made Menaka inggih punika sradha, jemet makarya, tresna asih, urati ring krama, awiwahara, miwah meled uning. Cutetnyane, geguritan Dharma Sthiti puniki sampun kakardi antuk wangun sane jangkep saha guna sarat paguron-guron sane kapanggihin mapaiketan ring kawentenan miwah parilaksana masimakrama. Saking tetilik puniki kaaptiang majeng ring krama Bali mangda prasida nglestariang budaya saha kria sastra Bali, sinalih tunggilnyane; geguritan. Ring sang pangwacen kaaptiang mangda prasida ngicenin paweweh indik kaweruhan sajeroning wangun intrinsik kria sastra miwah guna sarat paguron-guron sane wenten ring Geguritan Dharma Sthiti kekawian I Made Menaka. Punika taler ring panilik sane lianan mangda prasida kanggen pratiwimba ri kala makarya tetilikan sane kantun mapaiketan ring tetilikan puniki.

 

 

 

 

2.         Pahan Miwah Wewidangan Widya basa

Widya kabaosang madue kekuub sane jimbar. Punika sane ngawinang wenten pah-pahan sajeroning kuubnyane. Kawentenan punika taler kajantenang antuk Jendra (1991) sane maosang widya basa madue pah-pahan nganutin parikrama ri kala nguratiang. Salanturnyane, pah-pahan punika prasida kajantenang sakadi ring sor puniki.

1)                 Widya basa manut sudut lapangan (wewidangan) kapalih dados tigang pahan.

a.     Manut rumpun (lingsehan):

1)   Linguistik Indo-Eropah

2)   Linguistik Austroneisa

3)   Linguistik Smit

4)   Linguistik Rusia

b.      Manut bahasa tertentu (jejanten basa):

1)   Linguistik Inggris

2)   Linguistik Prancis

3)   Linguistik Indonesia

4)   Linguistik Malaysia

5)   miwah sane lianan

c.     Manut dialek/logat (wangun bebaosan):

1)   Linguistik Dialek Melayu Riau

2)   Linguistik Dialek Melayu Jakarta

3)   Linguistik Dialek Bali Negara

4)   Linguistik Dialek Bali Tabanan

5)   miwah sane lianan

2)                           Widya basa manut aspek pendekatannya (tetilikan; panureksan) kapalih dados petang pahan.

a.     Linguistik     Sinkronis,     inggih     punika     widya    basa     sane tetilikannyane kawatesin antuk galah.

 

 

b.    Linguistik Diakronis, inggih punika widya basa sane nelebang indik panglimbak basa sane taler kabaos widya basa historis.

c.     Linguistik Komparatif inggih punika widya basa sane nelebang pasaihan basa sane alingsehan turmaning kantun wenten paiketannyane. Yening pasaihan basa sane nenten alingsehan, kasengguh linguistik kontrastif.

d.    Linguistik Struktural inggih punika widya basa sane nganutin peplajahan basa manut tata wangun basanyane.

3)                           Widya basa Manut Tatujonnyane kapalih dados kekalih pahan.

a.     Linguistik Teoretis, inggih punika widya basa sane matetujon nglimbakang teori-teori manut sane keanggen nguningin kasujatian basa; taler kaanggen nguningin uger-uger basa ring basa punika.

b.    Linguistik Terapan inggih punika peplajahan widya basa sane kaplajahin ring wewidangan sane tiosan, minakadi malajahin indik ngwangun dasa nama, peta dialek, pangajahan basa, miwah nyantenang uger-uger sesuratan.

 

4)                           Widyabasa Manut Tata Wangun kapalih dados limang pahan.

a.     Widang fonetik, inggih punika pahan widya basa sane nelebang indik suara-suara basa.

b.    Widang fonemik (fonologi), inggih punika pahan widya basa sane nelebang suara-suara basa sane prasida minayang artos.

c.     Tata Kruna, inggih punika pahan widya basa sane nelebang sakancan tata pawangunan kruna manut wangun-wangun gramatikal sane kadruenin.

d.    Widang Tata Lengkara, inggih punika widang widya basa sane malajahin tata pawangunan lengkara manut wangun-wangun gramatikal sane kadruenin.

e.     Widang Leksikologi, inggih punika widang sane nelebang tata cara ngwangun kamus (dasa nama).

 

 

5)                           Widya basa Manut Panglimbakannyane kapalih dados petang pahan.

a.     Linguistik Tradisional (aab purwa)

b.    Linguistik abad pertengahan kantos abad ke-18

c.     Linguistik abad ke-19

d.    Linguistik abad ke-20

6)                           Widya basa Manut Sikap (sesana) miwah Aliran (penampen)

Sujana-sujana sajeroning widya basa madue sesana miwah tata titi sane pada matiosan. Punika taler ring panampennyane sajeroning basa, kasukseman basa, miwah metode sane kaanggen. Punika sane ngamedalang sesana miwah panampen widya basa manut aliran. Aliran widya basa kantos mangkin prasida kapalih dados sia pahan.

a.    Aliran Linguistik Tradisional

b.    Aliran Linguistik Jenewa

c.     Aliran Praha

d.    Aliran Konpenhagen

e.     Aliran Inggris

f.      Aliran Bloomfield

g.    Aliran Generatif Transformatif (Transformasional)

h.    Aliran Stratifikasi

i.      Aliran Tagmemik

j.      Aliran Kasus

7)                           Widya basa manut paiketannyane ring widya tiosan kapalih dados petang pahan.

a.     Psikolinguistik, inggih punika widya anyar sane medal duk warsa 1954 pinaka rangkepan pantaraning widya basa kalawan widya jiwa.

b.    Neorolinguistik (widya puhun wulu), inggih punika rangkepan pantaraning widya basa kalawan ilmu syaraf (widyapuhunwulu)

c.     Linguistik Matemaika, inggih punika rangkepan interdisipliner

pantaraning widya basa kalawan widya matematika.

 

 

d.    Sosiolinguistik, inggih punika rangkepan pantaraning widya basa kalawan widya sosiologi (pakraman)

Makudang-kudang panampen widya basa sakadi ring ajeng prasida nyantenang gegambaran sane sujati ngeninin indik bebaosan ring widya basa taler rangkepannyane kalawan widya sane tiosan. Yadiastun sampun kaangkenin pinaka widya sane mandiri, nanging widya basa nenten prasida lempas saking widya-widya tiosan.

 

3.         Panampen-Panampen Sajeroning Widya Basa

Soang-soang pupulan sujana utawi wagmi basa maduwe sesana sane mabinayan kalawan pupulan para sujana tiosan. Sapunika taler sajeroning panampen indik basa, kasujatian basa, miwah tata cara sane kaunggahang durung majanten pateh. Pabinayan sesana miwah panampen punika salanturnyane ngawinang wenten marupa aliran-aliran (panampen-panampen) sajeroning widya basa, minakadi: aliran tradisional, aliran struktural, aliran fungsional, aliran transformasional, miwah aliran tagmemik. Sajeroning modul puniki wantah kabahbahang tiga panampen widya basa sane ketah kaanggen dasar ri kala nglaksanayang tetilikan miwah pamalajahan basa Bali, inggih punika: aliran tradisional, aliran struktural, miwah aliran transformasional.

 

1)   Aliran Tradisional

Kirang langkung samas tiban sadurung warsa Masehi, Plato sampun prasida nyurat pah-pahan kruna sajeroning basa Yunani Kuna manut kasujatiannyane. Ri kala punika Plato ngepah soroh kruna basa Yunani Kuna dados kalih, inggih punika onoma miwah rhema. Onoma pinaka pawiwit bebaosan (kruna aran). Yening rhema punika kaanggen ngamedalang bebaosan (kruna kria). Salanturnyane, Aristoteles (384 SM-322 SM) ngepah soroh-soroh kruna sajeroning basa Yunani Kuno dados tiga, inggih punika: onoma, rhema, miwah syndesmos (nenten ngranjing ring onoma miwah rhema utawi nenten maobah).

Panglimbak widya basa sadaweg punika wantah nureksain indik kruna kemanten, pamekasnyane ring soroh kruna. Parindikan tata basa wawu kauratiang

 

 

ring panguntat warsane punika (130 SM) antuk Dyonisius Thrax sane kaunggahang sajeroning buku tata basa mamurda “Techne Gramatike”. Buku punika sane kacumpuin antuk para wagmi indik tata basa utawi sering kasengguh pinaka aliran tradisionalisme. Ri kala punika, soroh-soroh kruna sampun kapalih dados kutus pahan, inggih punika: (1) kruna aran, (2) pronominal, (3) artikel, (4)

kruna kria, (5) adverbial, (6) kruna pangarep, (7) partisipium, (8) kruna panyambung (Tasliati, 2011 http://tasliati.blogspot.co.id/2012/01/aliran-linguistik- tradisional.html).

Tata basa tradisional nyelehin basa manut kasujatian miwah kasukseman, imbanyane, ring kala mahbahang kruna kria pinaka kruna sane nyinahang tindakan (Chaer, 2003: 333). Ciri-ciri panampen purwa inggih punika:

a.     Madasar antuk tata manahing kasujatian

Wenten kalih parindikan sane nyantenang indik panampen purwa pinaka dasar tata manah kasujatian. Kapertama, pah-pahan soroh kruna sakadi tetimbang Plato (onoma-rhema) miwah Aristoteles (onoma-rhema- syndesmos). Kaping kalih, parinama panandang miwah jejering kantos mangkin kantun dados dasar pamalajahan utama sajeroning pamalajahan basa ring sekolah.

b.    Basa bebaosan miwah sesuratan nenten kabinayang.

Sajeroning tata manah puniki kantun kacapuhang indik artos basa (bebaosan) miwah sesuratan (marupa aksara). Punika ngawinang, artos suara/munyi kalawan aksara kantun macapuh. Parindikan punika prasida kauratiang ring punggelan puniki: “Antara vocal-vokal itu, huruf a adalah yang membentuk lubang mulut yang besar, i yang kecil, e biasanya terbentuk di dalam mulut sebelah muka, dan o di belakang sebelah ke dalam” (Soeparno, 2002: 44).

c.     Urati ngicenin artos

Parindikan puniki pinaka ceciren saking tata manah deduktif. Sakancan parinama kadulurin antuk ngicenin artos yadiastun wantah sakawentenannyane. Sajeroning panampen puniki nenten naenin nyantenang kasujatian-kasujatian basa, seseleh, miwah panyutetan.

 

 

Parindikan sane kautamayang sajeroning panampen purwa puniki wantah ngresepang parinama antuk ngapalang (ngingetang) artos sane kasusun manut kasujatiannyane.

d.    Basa sane kaanggen tinut ring uger-uger.

Parilaksana satinut ring uger-uger basa puniki katamiang saking para sujana tata basa purwa sane satinut ring uger-uger basa Latin. Uger-uger basa sane sampun kasusun antuk para sujana sajeroning buku tata basa patut kalaksanayang antuk panutur basa. Kaiwangan-kaiwangan mabasa sane nenten manut ring uger-uger kasinahang pinaka basa sane iwang miwah parilaksana sane nenten becik. Pamalajahan basa ring sekolah pateh sakadi sane kasurat ring buku tata basa. Pamargi sakadi puniki ngawinang sisyane waged saha lapah ring teori-teori basa, nanging nenten waged mabebaosan utawi mabasa basita sajeroning kauripane sarahina-rahina. Tata basa sane kaanggen punika kasengguh tata basa normative (kukuh ring uger-uger) miwah tata basa preskriptif (daken).

e.     Undag-undagan wangun basa durung durung prasida gampil.

Wangun basa sane pinih sor manut panampen purwa inggih punika aksara. Ring luhur aksara wenten kruna saha sane pinih luhur inggih punika lengkara. Aksara kapitegesang pinaka wangun basa sane pinih alit, kruna pinaka pupulan aksara sane maduwe teges, miwah lengkara pinaka pupulan kruna sane jangkep pitegesnyane.

f.     Sane kautamayang sajeroning tatabasa inggih punika soroh kruna

Ciri puniki sane pinih sinah pantara ciri-ciri tiosan. Indike puniki prasida katerima santukan panyorohan kruna pinaka pahan widyabasa sane pinih purwa sajeroning pepalajahan widyabasa (Soeparno, 2002).

Kautaman panampen widya basa purwa inggih punika: (1) pageh saha rajeg yadiastun sampun purwa santukan kadasarin antuk tata manah kasujatian; (2) pageh nginutin uger-uger basa sesuratan sane ngawinang wikan saha kaloktah sajeroning sesuratan basa; (3) akeh anake sane prasida wikan sajeroning negesin parinama-parinama; (4) pangweruhan indik tata basa prasida tumus santukan basa sane kaanggen setata tinut ring uger-uger sajeroning tata basa; (5) kukuh

 

 

sajeroning ngamargiang sesana sakadi punggelan paos: “yang benar adalah benar walaupun tidak umum, dan yang salah adalah salah walaupun banyak pengikutnya”.

Kakirangan panampen widya basa purwa inggih punika: (1) durung prasida minayang pantaring basa miwah sesuratan sangkaning teges basa kantun aor; (2) durung prasida nyantenang kenyataan (kasujatian sakala) sajeroning basa, seseleh, miwah panyutetannyane; (3) akeh anake sane wikan negesin parinama-parinama nanging nenten waged mabebaosan miwah mabasa basita ring pakraman; (4) undag-undagan wangun basa durung prasida gampil santukan wantah tetiga sane wawu prasida majanten, inggih punika: aksara, kruna, miwah lengkara ; (5) basa kabahbahang manut uger-uger basa Latin sane ngawinang durung majaten anut ri kala kanggen ring basa tiosan; (6) basa wantah kasinahang manut uger-uger basa sesuratan sane sujatine kantun akeh ragam (warna) basa tiosan sane prasida ngunggahang sesinah; dan miwah (7) indik bebaosannyane wantah kantos ring wangun lengkara sane ngawinang nenten prasida nyinahang aspek komunikatif (kahanan bebaosan ri kala nglaksanayang parikrama mabebaosan sarahin-rahina).

 

2)   Aliran Struktural

Kirang langkung 110 warsa sane lintang (warsa 1916), ri kala Ferdinand de Saussure, sujana basa saking panegara Swiss, sampun prasida ngrincikang pamargi ri kala ngicenin kuliah (pajah-ajahan basa) ring Universitas Jenewa sane ngawinang embas aliran Struktural punika salanturnyane. Unteng pajah-ajahan dane kapupulang antuk sisyandane sareng kalih, inggih punika: Charles Bally miwah ALbert Secheyaye. Pupulan ajah-ajahane punika raris kamedalang dados buku sane mamurda Course de linguistique generale. Sakancan pidaging ajah- ajahan sajeroning buku inucap salanturnyane kaanggen pinaka dasar ring aliran linguistik struktural (panampen widya basa nginutin tata wangun) sane ngunggahang (nemnem) uger-uger indik widya basa sakadi ring sor.

a.       Widya basa (linguistik) pinaka widya sane mandiri (prasida ngadeg ngraga);

 

 

b.       Basa pinaka sistem mandiri kasusun antuk langue (tata maya sane ngwasa panutur basa) miwah parole (tata cara mabasa panutur basa);

c.       Tetilikan basa prasida kalaksanayang manut sinkronis (manut basa sane kajantenang saha manut galah sane kajantenang) miwah diakronis (tetilikan basa kauratiang saking aab utawi masa sane riin kantos ring aab salanturnyane);

d.       Sajeroning tata basa wenten kalih paiketan pantaraning pasikian- pasikiannyane, inggih punika paiketan sintagmatik (pantaraning pasikian- pasikian sane majajar) miwah paiketan paradigmatis/asosiatif (pantaraning pasikian sane ngwangun tata basa maka sami nanging nenten sajeroning paiketan sane majajar);

e.     Basa pinaka tata pralambang (tanda) sane kaadegang antuk kalih wangun,

inggih punika signifiant (wangun/rupa) miwah signifie (pidaging utawi pitegesnyane);

f.      Pralambang punika kawangun manut arbitrary (sesukan) miwah manut

konvensional (cecumpon) (Saussure, 1974).

Yening cutetang bebaosane sakadi ring ajeng, wenten minakadi ceciren aliran linguistik struktural, inggih punika: (1) nginutin panampen behaviourisme (tingkah/parilaksana), basa pinaka parilaksana stimulus-response (tangirasa- tampi); (2) basa pinaka uncaran, basa wantah kapikayunan pinaka uncaran kemanten; (3) basa pinaka rangkepan pralambang (signifie saha signifiant) sane sesukan miwah manut cecumpon, signifie inggih punika wangun basa sane  wenten ring tata manah panutur utawi teges saha signifiant inggih punika wangun uncaran marupa suara; (4) basa pinaka parindikan sane lumbrah, punika ngawinang pamalajahan basa sane nginutin panampen puniki akehan nganggen metode drill miwah practice, inggih punika nglaksanayang peplajahan terus- tinerus, nglantur, saha mawanti-wanti kantos karasayang lumrah; (5) basa (wangun miwah teges) pastika matrima yening karasayang sampun ketah; (6) pah- pahan sajeroning tata basa masusun gampil ngawit morfem kantos lengkara; (7) seseleh basa kakawitin saking morfem; (8) basa kaselehin manut bahbahanyane;

 

 

(9) seseleh wangun basa kamargiang manut unsur langsung, inggih punika pahan sane ngraris prasida nyusun wangun basa punika.

Kaluwihan aliran struktural minakadi: (1) sampun prasida minayang  grafem (pabinayan sajeroning tata aksara) miwah fonem (pabinayan aksara sane ngawinang pabinayan teges); 2) metode drill lan practice prasida nincapang kawagedan mabasa basita santukan mawanti-wanti kaurukang kantos prasida lapah; (3) basa sane katerima inggih punika basa sane lumrah, punika mawinan kramane dangan nerima; (4) pah-pahan basa sampun gampil ngawit saking morfem, kruna, frase, klausa, kantos lengkara; miwah (5) madasar antuk fakta (kasujatian/pisaja), nenten ngawi-ngawi data.

Kakirangan aliran struktural minakadi: (1) majanten kapasahang pantaraning widang tata kruna miwah tata lengkara yadiastun kasujatianyane kalih widang punika pada saling mapaiketan; (2) ri kala ngamargiang metode drill miwah practice patut kadasarin antuk parilaksana sane tukun, alon-alon,  saha gelis waneh utawi “ngemedin”; (3) basa kasinahang pinaka stimulus-response sane kapatehang ring mesin, sakewanten maka sujatiane nenten boya ja mesin; 4) basa katerima manut panampen sane lumrah, yadiastun iwang manut uger-uger nanging yening sampun lumrah, sinah punika kapatutang; (5) nenten nguratiang faktor historis (aab panglimbak sadurungnyane); miwah (6) indik bebaosannyane kawatesin kantos pahan lengkara utawi durung maosang aspek komunikatif.

 

3)   Aliran Transformasional

Aliran transformasional kapucukin antuk Noam Chomsky (1957) maka panungkas sajeroning aliran struktural. Tata manah sajeroning aliran strukturalisme sane dahat katungkasin inggih punika indik basa sane kasengguh faktor kebiasaan (lumrah). Wenten makadi dasar-dasar tetimbang sajeroning panampen widya basa aliran transformasional inggih punika:

a.     Basa pinaka kakawian budaya sane kakripta antuk i manusa

b.     Basa nenten marupa parilaksana mekanis, nanging mapaiketan ring kaseukseman sane kamedalang marupa suara basa turmaning prasida kapireng utawi kalimbakang marupa sesuratan.

 

 

c.     Basa pinaka polah-palih sajeroning ngripta, punika mawinan seseleh basa patut kadasarin antuk tata manah deduktif.

d.     Kawentenan rumus-rumus matematis prasida kaanggen makarya uger-uger kekawian basa.

e.     Seseleh basa nenten prasida lempas saking kasujatian basa, minakadi suara miwah teges.

Kaluwihan aliran transformasional minakadi: (1) mabasa pinaka polah- palih sane mapaiketan ring kasukseman utawi nenten ring fisik; (2) kapasahang pantaraning linguistic competent kalawan linguistic performance (kaweruhan mabasa kalawan kawagedan mabasa); (3) prasida makardi wangun-wangun basa tiosan manut uger-ugernyane; (4) prasida kabinayang pantaraning unteng bebaosan miwah wangun bebaosan santukan sampun kabinayang pantaraning lengkara inti miwah lengkara transformasi; miwah (5) prasida ngamedalang lengkara sane tan pawates wilangannyane santukan saking uger-uger tata basa punika prasida kakawi saha kalimbakang makudang-kudang lengkara sane tiosan. Kakirangan aliran transformasional minakadi: (1) yadiastun manusa maduwe sakadi bebaktan angga sajeroning mabasa sakewanten yening nenten kapiurukang, sinah nenten prasida pacang waged mabasa; miwah (2) nenten ngangkenin kawentenan klausa sane ngawinang nenten wenten pabinayan klausa kalawan lengkara.

 

·         Non Contoh

Ring sor puniki wenten wangun sasuratan basa Bali sane nenten manut kaanggen pinaka imba sajeroning widya basa.

“Hyang api, simayangňa hangga minanga kangin, hangga bukit manghandang kalod

hangga tukad batang karuh hangga tasik kadya”

 

 

Tegesnyane sajeroning basa Bali sakadi ring sor.

Hyang Api, wates wewidangan ring kangin mawasta Minanga, ring kelod kawatesin bukit Manghadang, ring kauh kawatesin tukad Batang, miwah ring kaja kawatesin sagara.

 

Sasuratan ring ajeng wantah pinaka sinalih tunggil prasasti Bali Kuna sane nenten ngranjing ring sasuratan sajeroning pamalajahan basa Bali. Sasuratan inucap prasida dados panandang ri kala kamargiang tetilikan-tetilikan sajeroning widya basa Bali.

 

·         Forum Diskusi

Ri sampune para pamilet prasida ngresepang pidaging peplajahan indik basa Bali pinaka widya, salanturnyane mangda ngalaksanayang pabligbagan gumanti sayan tatas ring kasukseman, wewidangan, miwah panampen para sujana sajeroning widya basa.

 

 

C.     Penutup Rangkuman

Widya basa utawi kabaos linguistik sajeroning basa Indonesia kapikukuhang saha kaangkenin pinaka widya sane mandiri (ngadeg ngraga pinaka widya) ring pangawit aab (Abad) ke-20. Tetilikan indik basa sampun sue kamargiang turmaning ngawinang akeh ngamedalang pikolih sane prasida kadadosang teori (tata manah/dasar manah/dasar tetimbang). Ruang lingkup (kekuwub) soang-soang widya majanten jimbar pisan sane ngawinang wenten pah-pahan ring sornyane pinaka pahan saking kuwub sane luhuran. Soang-soang pupulan sujana/wagmi basa maduwe sesana sane mabinayan kalawan sujana tiosan. Sapunika taler ring panampen indik basa, kasujatian basa, miwah tata cara sane kadruenang pastika durung majanten pateh. Pabinayan sesana miwah panampen punika sane ngawinang wenten aliran-aliran (panampen-panampen). Wenten minakadi Panampen-panampen sajeroning widya basa sane marupa: aliran tradisional, aliran struktural, aliran fungsional, aliran transformasional, miwah aliran tagmemik.

 

 

·         Daftar Pustaka

Bloomfield, L. (1993). Language. New York: Holt Inc.

Chaer, A. (2003). Psikolinguistik: Kajian Teoritik. Jakarta: PT. Rineka Cipta. Chomsky, N. (1957). Syntactic Structures. The Hague: Mounton.

Fromkin, V., & Rodman, R. (1988). An Introduction to Language. New York: HOLT, RINEHART, AND WINSTON, INC.

Jendra, I. W. (1991). Dasar-Dasar Sosiolinguistik. Denpasar: IKAYANA.

Saussure, F. d. (1974). Course in Generale Linguistics. Terjemahan edisi bahasa inggris olehW. Basukin. Glasow: Fontana/Collins.

Soeparno. (2002). Dasar-Dasar Linguistik Umum. Yogyakarta: Tiara Wacana. Subroto, E. (1992). Pengantar Metoda Penelitian Linguistik Struktural.

Surakarta: Sebelas Maret University Press.

Sudaryanto. (1988). Metode Linguistik. Yogyakarta: Gajah Mada University Press.

Astina.Kadek, dkk. (2016). “Basita Paribasa Nganggen Kruna-Kruna Sane Mapaiketan Sareng Ayam ring Desa Tukadsumaga Kecamatan Gerokgak”. Jurnal Pendidikan Bahasa Bali, Volume 3, Nomor 1.

Darmadi.Adi I Putu, dkk. (2015). “Seseleh Basita Paribasa Miwah Guna Sarat Paajah-Ajah Karakter Sajeroning Dolanan Ring Gong Kebyar Alit-Alit Duta Kabupaten Gianyar Warsa 2014”. Jurnal Pendidikan Bahasa Bali, Volume 2, Nomor 1.

Suryati.Ari Ni Wayan, dkk. (2016). “Wangun Intrinsik Lan Guna Sarat Paguron-Guron Ring Geguritan Dharma Sthiti Kekawian I Made Menaka”. Jurnal Pendidikan Bahasa Bali, Volume 4, Nomor 2.