CONTOH TEKS DHARMAWACANA KAJENG KLIWON

OM SWASTYASTU,

            Angayubagia uningayang titiang, majeng ring Ida Sang Hyang Widhi Wasa, riantukan wantah sangkaning asung kerta wara nugraha ida, mawinan iraga prasida mapadu wedana ring galahe sane becik puniki. Sadurung titiang ngojahang amatra ngenenin indik pidaging darmawacana, titiang nunas geng rena sinampura majeng ring ida dane sinamian, riantukan purun titiange ngelangkungin linggih ida dane sami, pacang ngojahang amatra ngenenin indik pidaging darmawacana inggih punika, “KAJENG KLIWON”.

Inggih ida dane sinamian, sayuwakti sekadi mangkin, rumasa sami sampun uning ring kawentenan kauripane, pamekas iriki ring Bali. Kawentenan krama ring Bali nenten dados palasang ring sahananing kawentenan yadnya sane utama wiadin alit. Sajeroning yadnya punika nenten ja kacingak ring brana kemaon,kewanten naler ring sajeroning upacara-upacara yadnya inggian sakadi panca yadnya.  Kawentenan kajeng kliwon punika pinaka pahan saking panca yadnya inggih punika Bhuta Yadnya sane pinih alit. Kajeng Kliwon puniki sampun ketah kauningin pinaka raina tedunnyane sarwa bhuta sane jagi ngrereh sang sane nenten ngamargiang dharma Agama. Raina puniki rauh ring triwara kajeng lan panca wara kliwon nyambran lima welas raina apisan (15 hari sekali). Manut mitologi Hindu sampun kasobiahang tatujon ngaturang segehan manca warna pinaka nguncarang rasa bhakti miwah srada ring Hyang Siwa sane sampun nyomia sang tiga bhucari. Rarainan kajeng kliwon puniki kapah dados tiga minekadi: Kajeng kliwon uwudan, kajeng kliwon enyitan miwah kajeng kliwon pamelastali (watugunung runtuh, yang datang setiap enam bulan sekali). Rikalaning kajeng kliwon krama Bali ketah ngaturang blabaran miwah tipat dampulan ring makudang-kudang palinggih/sanggah. Minakadi ring taksu,panglurah, panuun karang,sumur, ring pamedalan miwah ring bale payadnyan.

Banten tipat bantal katurang ring palinggih tur segehan katur ring sor palinggih. Tipat dampulan punika dasarnyane/tatakannyane ngangge cemper wiadin tamas ring dija genah ngenahang tipat dampul,rerasmen, ulam,taluh mateng,raka-raka miwah sampian plaus utawi kepet-kepetan madaging plawa, porosan, uras sari, bunga,rampe tur boreh miik. Yening cingakin  kawentenan tipat dampul sane katurang ring palinggih janten sampun katuur majeng ring Ida-bhatara-bhatari manut babad Bali. Matiosan ring segehan katurang ring sor palinggih sane kaicenin ring para bhuta-bhuti mangda ipun degdeg nenten ngugul/ngusak asik kawentenan pawongan. Manut buku bhuta yadnya kruna segehan mawit saking kruna sega maartos nasi. Nika mainan kawentenan segehan kakaryanin wiwitne saking nasi. Segehan puniki wangunnyane wenten makudang kudang cacakan, sakadi  segehan cacah inggih punika segehan sane marupa nasi puti maulam be wang jahe, miwah segehan maca warna inggih punika anggkepan nasi warna lima nganutin genah sekadi putih ring purwa, barak ring daksina, kuning ring pascima, selem ring utara, tengah tengah campuhan petang warna punika kawewehan warna gadang. Kawentenan pangatur segehan punika naler kadagingin api angkep (api yang dibentuk dari dua buah serabut kelapa yang dicakup manyilang sehingga membentuk swastika) tur wenten naler toya, sajeng mentah,sajeng rateng miwah berem.

Inggih ida dane miwah semeton sami, kadi asapunika titiang prasida ngojahang pidaging darmawacana ring galahe sane becik puniki. Atur suksma titiang majeng ring uratian ida dane sinamian.

Jukut kangkung numbas ring semarapura,

kirang langkung titiang nunas sinampura,

jukut klongkang ring sukawati,

Puputang titiang antuk parama shanti.

 

OM SHANTI, SHANTI, SHANTI OM.