MODUL PPG KASUSASTRAAN BALI ANYAR

 Kesusastraan Bali Anyar

A. Purwaka

Modul puniki kaangge pinaka sarana nyangkepin kaperluan guru bahasa Bali majeng materi Kesusastraan Bali Anyar ring sajeroning nyarengin parikrama PPG. Keperluan pemilet PPG pacang malajah ngarereh saking makudang-kudang sumber buku dahat akeh, punika awinan modul puniki pinaka pamargi sane pinih becik pacang dados road map/titi pangancan, lamakane para pamilet PPG prasida mlajah sekadi elah (sistematis). Mlajah sane elah ngranayang prasida mikolihang kawagedan (Kompetensi Dasar) sane kaaptiang saking paplajahan punika. Sajeroning modul puniki pacang kabligbagang ngeninin indik Wentuk kesusatraan Bali Anyar;Cerpen Bali Anyar, Novel Bali Anyar, Drama Bali Anyar, lan Puisi Bali Anyar.

 

B. Capaian Pembelajaran

Menguasai materi, struktur, konsep, dan pola pikir keilmuan yang mendukung mata pelajaran Bahasa Bali.

 

C. Sub Capaian Pembelajaran

Memahami teori dan genre sastra Bali.

 

D. Uraian Materi

1. Kesusastraan Bali Anyar

Kesusastraan Bali Anyar inggih punika kekasusastraan sane sampun polih panglimbak saking sastra Indonesia minakadi wentuk lan temanyane sampun modern utawi anyar sairing aab jagate mangkin lan nganggen basa Bali Lumbrah. Wentuk kesusatraan Bali Anyar;

a. Cerpen Bali Anyar

b. Novel Bali Anyar

c. Drama Bali Anyar, lan

d. Puisi Bali Anyar

Kesusastraan Bali Anyar sampun wenten duk panjajahan welada, daweg welandane ngawangun sekolah rakyat warsa 1875 ring Buleleng. Duk warsa 1910-1920-an I Made Pasek lan Mas Nitisastro pinaka guru ring sekolah rakyat punika sampun prasida makarya satua bawak. Kriya sastra cerpen punika kamuat ring buku-buku paplajahan ring sekolah rakyat punika minakadi buku; “Tjatoer Perenidana, Tjakepan kaping doea papeladjahan sang mamanah maoeroek mamaos aksara Belanda” Pikardin I Made Pasek duk warsa 1913. Buku puniki madaging 46 murda satua

silih sinunggil satua mamurda “Balian”. Satua Puniki sampun mabinayang sareng satua sane dumun. Satua puniki sampun madue unteng anyar nyatuayang indik kawentenan jadma ring kahuripanne mangkin. Unteng satuanyane sampun kontemporer. (Putra, 2010; 9-10). Ring sor jagi katelatarang indik soroh-soroh sastra Bali Anyar;

 

a. Cerpen

Cerpen punika soroh sastra Bali marupa gancaran sane susunan panyuratanne nganutin srana (unsur) cerita pendek Indonesia, tur ngundukang tetuek reraosan wantah akidik. Cerpen puniki madue wangun utawi caciren matiosan ring satua Bali sane kabaos dongeng ring kasusastraan tutur.

Ceciren cerpen;

(1) lelampahannyane bawak utawi cutet

(2) Madue unteng sane nunggal

(3) Indik pragina, lelampahan ring cerpen nunggal.

(4) Yening galah ngawacen wantah apisan utawi nelasang galah kidik.

Wenten kakudang-kudang kriya sastra cerpen;

 

a) Duk Jaman Welanda warsa 1910-1920-an

· Balian (I Made Pasek)

· Pamadat (I Made Pasek)

· Ayam Mapalu (I Made Pasek)

· I Keliud teken I Tragia (I Made Pasek)

· Keneh Djujur dadi Mujur (I Made Pasek)

· Jelen anake demen nginem inum-inuman ane Mekada Punyah, luire; jenewer, berandi teken ane len-lenan. (I Made Pasek)

· Anak Ririh (Mas Nitisastro)

· Loba (Mas Nitisastro)

 

b) Terbitan Pondok Tebawutu, Gianyar warsa 2003

· Leak Lemahan (Djelantik Santa)

· Godeg (Komang Adnyana)

· Sipta Durmanggala (I Gst Pt. Bawa Samargantang)

· Pangupajiwa (I Wayan Sada)

· Relawan (I Nyoman Manda)

· Baja Kota (Ni Wayan Margiani)

 

c) Terbitan Yayasan Sabha Sastra warsa 2004

§ Pan Bagia teken Pan Bonggan

 

d) Terbitan Pondok Tebawutu warsa 2004 wenten pupulan satua bawak pikardin I nyoman Manda;

· Pupulan Satua Bawak sane mamurda “Demo” madaging 8 satua bawak; Tedun, Pasisi, Ngulah Kedis, Sing Ada Apa De, Demo, I cubling, Ogoh-ogoh, Gaak-gaik.

· Pupulan Satua Bawak sane mamurda “pongah” madaging 8 cerpen; Dagang Tiying, Nancep, Pongah, Serangan Fajar, Baju Kaos, Magundul, Titi Buin Pidan, Satua di Pajongkokan.

 

e) Terbitan Pondok Tebawutu warsa 2005, madaging 12 cerpen;

· Gedange magetah getih (Djelantik Santa)

· Satua di Pajongkokan ( I Nyoman Manda)

· Rikala Suryane Mawarna Jenar (Putu Sedana)

· I Suasta Setahun di Bedahulu (A.A. Pandji Tisna)

· Tapak Dara lan colek Pamor ( I Gst Pt. BawaSamargantang)

 

Imba cerpen

 

MADE KARTI

Jani muride ngawitin masuk. Murid- muride sing melajah. Dinane ento muride mebersih- bersih, mersihin kelas, ngatur bangku ngelantur mekedaskedas di natah sekolahe. Wireh jani sube menek kelas, makejang meginsir kelas, nongosin kelas anyar. Kelas pate maan nongosin kelas ane di tengah. Mekejang gupung megarapan. Ade masih ane sambilange ngorte nyaruang kenyel. Luh Ranti ngajak Made Karti nyampat di natah sekolahe. Ia saling takonin pejalan dugas libure. Luh dije melali dugas libure?’’ Made Karti metakon teken Luh Ranti. Luh Ranti nyautin,’’Tiang,kaumah I Pekak di desa. Tiang maan nginep ditu duang lemeng.’’ Luh Ranti ngelanturang nutur.’’ Dugase ento masan manyi. Tiang nutug I Pekak kacarik. Tiang nepukin petanine repot manyi. Ada ane ngarit, ada ane ngedig padi. Di subane mangedig ane luh- luh napinin jijihe laut menpen ka kampile. Di subane sanja tiang manjus di pancorane. Beh,demen pesan atine di desa.’’

‘’ Yan Made, kije dugas liburane?’’

‘’Tiang tusing kije- kije. Mungpung libur, tiang nulungin memen tiange medagang di peken. Pedalem ia tuyuh padidian.’’ Keto pasautne Made Karti. Luh Ranti tusing ngelanturang metakon. Di kenehne, ia matutang pamineh lan laksanane Made Karti. Ia mule anak cerik jemet. Bel sekolahe mamunyi, muride masuk ka kelas soang – soang.

 

Imba sane siosan

Matunggalin Ngwangun Kaluihan

Inggih Ida dane sinamian, sane mangkin caritayang titiang, kocap ring sor palebahan gunung Agunge wenten pondok sadarana, kaiterin antuk taman sane asri pekantenane turmaning ngelangunin manah sang ngatonang. Pondok punika nenten je tios pondok Pan Urip. Ipun sareng kurenane madue pianak lalima, maka lalima pianakne lanang, inggih punika: I Wayan Urip, pianaka pianakne sane pinih duur,sane kapiandel nulungin reraman ipune magarapan. Ipun taler seneng matanduran bunga miwah plawa tur seleg miara, nike mawinan pekantenane pondok ipun becik tur asri. Pianakne sane kaping kalih wastanine I Nengah Siep, santukan ipun duke embas nenten prasida nangis utawi tan masuara. Duke punika ngawinan engsek manah Pan Urip sareng kurenane,nangis bagia manah ipun sareng kalih santukan tan asue prasida rarene makitipan tur nangis. Risampune trune I Nengah Siep paling sitenga yan saihang ring penyamane I Nyoman Pasek, pianakne sane kaping tiga sadurung ipun embas, Men Urip keni penyungkan binggung, tur ngutsahayang ngrereh tamba ring anak wikan mangda kurenane sareng bobotane praside slamet rahajeng. Utsaha Pan Urip mapikolih nika mawinan kawastanin I Nyoman Pasek, manut pesengan

sane prasida ngicen tamba. Pianakne sane kaping pat matiosan malih, ipun paling bagus yan saihan

ring panyamane, kawastanin I Made Bayu. Diastun ipun paling bagus parilaksanane becik pisan, nenten sombong. Sering ipun ngandap sasorang ragane teken nyamane miwah timpalne. Lianan ring punika I Made Bayu sering mapitulung teken timpalne sane kariben pakeweh, punika mawinan sami nyaman utawi timpalne seneng teken I Made Bayu. Pianaknyane sane paling alit mawasta I Ketut Wiguna, mungguing parilaksanane becik tur dueg sakewala keras hati. I Ketut Wiguna nuut sareng beline paling duur, I Wayan Urip. Sane mangkin kacaritayang sampun duur maka lalima pianakne Pan Urip maka sami saling asah, asih lan asuh rukun masemeton sane ngawinan reramane bagia ngatonang. Santukan pianak ipun sampun duur, metu manah ipun ngrereh pangupa jiwa ngadu nasib ka kota. I Ketut Wiguna mabaos sareng reraman ipun:’’Meme wiadin Bapa, titiang mamanah pacang ngrereh gegae ka kota.’’ ‘’Apa ning....?Cening ka kota keto....sampunang ning, ngoyong cening jumah, meme kari prasida miara cening.’’pasaut memene engsek tur ngembeng yeh panyingakane. Bapang nimbalin ngraos :’’ Ning, idup di kota kaden cening gampang anak sukeh ning..., bisa-bisa cening....(bapane nenten ngelanturang jejeh pianakne kena narkona). Miragi asapunika I Ketut Wiguna salah tampi tur masaur sada brangti,’’Meme,Bapa kaden tiang nu cerik? Tiang sube truna, dot manah tiang merantau tur idup berdikari, tawang meme...?(I Ketut Wiguna santukan ipun pedih raris ipun magedi ngojog ka kubu di tengah carike, nenten ngerunguang kenken manah reramane sareng belinyane.

 

Bapa miwah memene ningalin asapunika engsek ring manah sambilange mapineh-pineh tur merenung sareng pianakne. I Nengah Siep ngraos, ‘’me, jag depin baang I Ketut Wiguna ka kota. ‘’Memene masaut sambilange ngeling, ‘’Cening ajak mekejang, cening suba nawang perah adin ceninge tusing dadi belokang, bisa-bisa ane boya laksanaina.’’Raris I Made Bayungemedalang tatimbang,’’Nah yan kamanah baan titiang, jalan ja ajak makejang nyarengin adine ka kota, sinah pacang prasida saling tulungin yening manggihin pakeweh.’’WayanUrip nimbahi,’’ yen keto kenken lantas i meme miwah bapa, nyen ane ngerunguang?’’ Memene raris nyautin sada alon,’’Nah kema suba cening malajah ka kota, depang sube meme wiadin bapa jumah sakewala pangidih memene, ingetang wit ceninge tur melahmelah ajak nyama!!!’’

‘’Nah yan keto, gamblang pajalan tiange, tiang pacang ngalih adin tiange I Ketut unduk buin pidan pacang mejalan ka kota.’’ Sane mangkin kacritayang I Ketut Wiguna malajan mulih, kantunmanah

ipun kesel, napi sane ngalangin pajalane ambise. Gelisan carita makalalima pianakne Pan Urip ka kotangrereh pangupa jiwa, sangkaning pasuecan Hyang Widhi, makalalima polih gegaen sekadi pengaptine. I Wayan Uripdados wiraswastawan tanaman hias,sekadi angrek, jepun, cemara, sarwa plawa miwah tetanaman langka sekadi kedongdong, badung,kaliasem, sentul, utu miwah sane lianan. I Nengah Siep dados karyawan Bank sane mandiri, I Nyoman Pasek madue toko obat sane ngadol reramuan tradisioanal sane kasub ring kota punika.I Made Bayu madasar antuk kebagusan miwah jiwa seni mangigel dados pragine sane prasida ngaryanang makudang- kudang karyawan.

Diastun asapunika kesuksesan ipun, maka sami ipun nenten rered saling asah,asih,asuh tur rukun manyama mangenah ring umah asiki tur ipun makasami nenten lali ring rerama. Nika mawinan reramane bagia pisan santukan pianakne ngemolihang manut ring pengaptine tur prasida hidup rukun saling asah, asih, asuh sareng nyaman- nyamane maka lalime. Caritayang mangkin Desa Pancasila genah pondok Pan Urip jagi ngamiletin pacentokan utawi lomba desa. Santukan jagi ngamiletin lomba janten akeh prabian utawi dukungan saking krama desane miwah sane malinggih ring kota minakadine keluargan Pan Urip sane sampun idup rukun nenten kirang punapa- punapi. Indike punika sampun kapireng olih pianakne Pan Urip raris ipun maitungan sareng lalime indik wantuan sane jagi kabuat ka desane. I Wayan Uripmabaos,’’ Adi ajak makejang iraga patut mapitulung sareng desane, santukan adane iraga buka jani sangkaning ulian di desa.’’ I Nengah Siep nyautin,’’ saja beli, tiang mase mautang teken desane, iraga patut ngewalesin.’’ Nah yan keto apa nyidaang nulungin, I Nyoman Pasek nimbalin,’’yan kamanah baan tiang iraga sube ngelah sane manut kaptiang olih desane sing keto tut: I Made Bayu ngawewehin. I Ketut Wiguna makesiab mara ningeh raos beline santukania bengong minehin apa sane kabuat ka desa apang ada gunane. I Ketut Wiguna raris nyaurin,’’beneh saja car raos beline ajak makejang, yan kamanah baan titiang. Beli Urip ngawewehin soroh tinanduran minakadi plawa, bunga mangda desane asri

pakantenane. Beli Nengah ngawewehin dana utawi prabia, Beli Nyoman santukan madue obat –obatan utawi ramuan tradisioanal patut sumbangang ring krama desane, Beli made ngaturang barang seni utawi unen-unenan. Nah yan keto kenken beli setuju?’’ Makejang beline masaur, setuju. Inggih punika dane sinamian sangkaning wantuan keluargan Pan Urip miwah krama desane raris desa punika ngamolihang juara. Bagia pisan manah Pan Urip sareng Men Urip santukan krama desane prasida nyikiang raga ngeluihang desa Pancasilane.

Kakutip saking buku Widyasastra

Olih: I Gede Yuhana Darma Sasmita

SLTPN 1Tabanan

b. Novel

Kesusastraan sane ngawentuk novel puniki sampun wenten duk warsa 1931, novel punika mamurda “Nemu Karma” pakaryan I Wayan Gobiah. Pateh sakadi satua bawak punika, sastra novel puniki wangunnyane pateh sakadi novel ring sastra Indonesia. Lelampahan caritanyane panjang, nyaritayang kahuripan praginanyane saking alit kantos lingsir utawi padem. Puniki jagi kawedarang indik ceciren novel;

(1) Novel punika tergantung sareng praginanyane

(2) Lelampahan novel medaging kalih utawi lintang unteng carita

(3) Nyaritayang akeh pragina

(4) Wewidangan lelampahan satua jimbar.

 

Ring sor puniki wenten makudang-kudang kriya sastra novel;

§ Novel Nemu Karma (I Wayan Gobiah)

§ Novel Malancaran ka Sasak (I Gede Srawana)

§ Novel Sayong (I Nyoman Manda)

§ Awengi ring Hotel Sentral ( I Gst. Pt.Bawa Samargantang)

 

c. Puisi

Kasusastraan puisi puniki kamedalang duk warsa 1959 sane kamuat ring majalah Medan Bahasa Basa Bali. Wenten silih sinunggil puisi mamurda “Basa Bali” karya Suntari Pr. (Putra, 2010; 79). Puisi puniki pinaka kriya sastra sane medal kapertama puisi Bali anyar, sane kaadegang pinaka tunggak panglimbak puisi Bali Anyar. Ring sor puniki jagi kawedarang indik wangun puisi;

 Judul (Murda) ; murda puniki ngawangun puisi

 Tema (unteng,Suksman utawi tetuek); unteng sane meled kawedarang saking pangawi inggih punika; indik, kadiatmikan, kaweruhan, tatuwek, kawentenan kahuripan parajana.

 Suara (Kanti suara utawi sajak); kanti suara dahat mautama sane

ngawangun puisi, krana kanti suara punika sane ngawi puisi punika becik kapireng lan kawacen, lan basanyane ngulangunin.

 Kalimat (lengkara); tata lengkaranyane kasurat pegat-pegat, lan kalanturang ring sor, nika sane ngawinang ngawentuk sajak utawi kanti suara, sane prasida puisi (sajak) punika madue tanjek lan

pangrasan ring soang-soang kruna ring lengkarane.

 Imaji (wirasa, daya bayang); para pengawi stata ngawetuang

daging kekawiannyane mangda sang sane ngawacen seneng.

 Kosabasa (kosa kata); kaweruhan sang pengawi indik kawentenan kosabasa sane wenten ring puisi punika sane nyutetang daging puisi punika becik.

Ring sor puniki jagi kawedarang indik puisi Bali Anyar lan pangawinyane;

· Idup lan Mati ( I Made Sanggra)

· Sasih Karo ring Bali (I Made Taro)

· Galang Bulan (K.Putra)

· Mati Nguda (Putu Sedana )

· Bali (Ngurah Yudha Panik)

· Pura Agung Jagat Natha, Margarana (I Wayan Rureg Nataran)

· Pangubaktian Tan Payasa (Gst Putu Antara)

· Denpasar sane Mangkin (Made Sanggra)

 

 

Imba Puisi Bali Anyar

 

MUSUH BETEN CUNGUH

 

Sang dwi warna makibar di ambara

Di stang motor, muah telajakan umah

Sang dwi warna nyabran tiban makipir

Makenyir kewala sengir

Royod, 66 tiban ayag oyog

Ngliwatin telung masa

Orde lama, baru muah reformasi

Orde sera panggang sera tunu

Orde korupsi

Nyen ane belog?

Indonesia iragane kebus

Ane beten matambus

Ane baduur kakudus

Uyak mekel markus

Indonesia iragane buduh

Sing nepukin musuh di beten cunguh.

Olih ; I Made Sugianto

Bali Post Redita Paing,20 November 2011

 

NYEM LALAH

Sing ja lakar mupu

Mekejang anake suba tau

Sing masaing goba ajak laksana

Sing adung laksana ajak wibana

Luungan tuun mai dini

Munyi ane tusing maaji

Adep dini aji duang tali

Sampunang kenyem-kenyem

Mara mesuang munyi ane nyem

Sampunang ngaku elah

Mara masuang munyi ane lalah

Nyem lalah sing ja melah

Paling melah nongos jumah

Olih; I Komang Gede Hendra Arismawan

Bali Post Redita Umanis, 1 Juni 2012

 

d. Drama

Kawentenan drama ring Bali sampun becik pisan nanging kantun mawentuk drama Bali klasik lan drama gong. Drama gong puniki kantun nganggen cerita kesusastraan Bali Purwa minakadi satua Panji arang utawi nenten wenten naskah drama sane jangkep, nanging nganggen sinopsis utawi ringkesan cerita kemanten lan lelampahannyane karagragang saking para praginanyane. Yening Drama Bali Anyar sampun nganggen naskah utawi lelampahan sane kasurat, sampun nganggen juru arah (sutradara), nganggen music modern, bebaosan sampun sakadi kawentenan sarahina-rahina, busananyane nganggen busana sakadi busana serahina-rahina. Seni teater sekadi drama punika para pragina sepatutne madue kaweruhan indik seni sastra, seni tari utawi igel-igelan, seni music utawi gambelan, seni rupa, lan seni vocal. Drama punika malianan sareng novel lan cerpen krana kawentenannyane ajeg nenten wenten paubahan. Drama punika kasengguh becik ritatkala sang pragina sampun prasida masesolahan ring ajeng pamiarsa. Wenten makudang-kudang perangan, manut dagingnyane wenten 9 pahan inggih punika (Karmini, 2011; 156-158)

1) Duka cerita (tragedi); drama puniki lelampahannyane akeh wenten duka lan lara sane kapolihang pragina utama ring kahuripannyane.

2) Bebanyolan (Komedia); drama puniki setata ngae pamiarsa ica, ngrasa suka, lelampahannyane kaambil saking kawentenan kahuripan janma, sane caritanyane kalebiin nika sane ngawinang banyol.

3) Duka cerita dan Suka cerita (Tragedi dan Komedi); drama puniki lelampahannyane macampuh wenten suka, wenten duka.

4) Opera; drama sane mawentuk opera ring sesolahan drama punika wenten gagendingan lan wenten gambelan utawi music.

5) Operette; Drama puniki cutetan tekening drama opera.

6) Tabelau inggih punika drama sane nenten madaging dialog utawi suara, drama puniki mirip sakadi pantomin

7) Dagelan; pamentasan drama puniki sampun karangsukin bebanyolan.

8) Drama mini kata; drama puniki akidik medaging bebaosan utawi

dialog, nanging ceritanyane sampun kagambarang saking sesolahan.

9) Sendratari; drama puniki ritatkala pamentasan nenten wenten suara saking praginanyane, nanging bebaosan punika rauh saking dalang.

 

Drama puniki pacampuhan saking gerak sane kawangun saking sesolahan. Lelampahannyane kambil saking carita Ramayan lan Mahabarata. Pengawi kriya sastra ring Bali, sampun ngangsan ngawi sasuratan drama Bali anyar, niki mawinan kawentenan sastra Bali anyar ngangsan akeh. Wenten makudang-kudang kriya sastra drama ingging punika;

· Kirana ( I Nyoman Manda) kamedalang olih Pondok Tebawutu, Gianyar duk warsa 2005

· Gusti Ayu Klatir (A. Wiyat S. Ardi) kamedalang olih pemda Gianyar, kaunggahang ring Buku Gending Girang Sisi Pakerisan duk warsa 1999

· Kobaran Apine, Aduh Dewa Ratu, Ki Bayan Suling (Gede Darna)

· Nang Kepod (Ketut Aryana)

· Putu Arya Semadi (Palakarma)

 

 Imba Drama mimi kata

Guru : ‘’cening ketua osis, meriki ja dumun paekin guru!’’

Ketua Osis :’’Om Swastiastu’’

Guru :’’Om Swastiastu’’

Ketua Osis :’’Nawegang titiang guru, wenten gatra napi?’’

Guru :’’Ngawit rahinan mangkin cening miwah sisiane sami

Pamidabdab jagi nyanggra lomba ‘’Adiwiyata’’ warsane Puniki.’’

Ketua Osis :’’Napi nike Adiwiyata punike guru?’’

Guru :’’ Adiwyata punika mawit, saking basa sansekerta saking kruna Adi lan Wiyata. Adi meteges: agung, becik, lan sampurna. Wiyata mateges: genah ring dija ja para sisia malajah

kaweruhan. Adiwiyata mapikenoh genah sane becik lan asri para sisia ngruruh sekancan kaweruhan pinaka dasar ngulati karahayuan.’’

Ketua Osis :’’ Napike tetujon Adiwiyata punike guru?’’

Guru :’’tetujone Adiwiyata punike wantah ngwangun sekolahe Sane asri pinaka genah warga sekolah malajah lan mautsaha Nglanturang keselamatan’’Lingkungan Hidup’’ sarwa Mauripe lan pawangunan sane nglantur kaantos kawekas.’’

Ketua Osis :’’Napi kemanten kriteria penilaian lomba Adiwiyatane punika Guru?”’

Guru :’’Sujatine kriteria penilaian lomba Adiwiyata punika akeh pisan Sakewale yening ringkes sekadi puniki:

1. Pengembangan kebijaksanaan sekolah

2.Pengembangan kurikulum berbasis lingkungan

3.Pengenbangan kegiatan berbasis partisipasi

4.Pengembangan pengelolaan sarana penduduk sekolah

Ketua Osis :’’Napi sane patut kelasanayang titiang pinaka sisia mangda Mresidayang ngamiletin lomba Adiwiyata punika tur maning Mangda ngamolihang juara?’’

Guru :’’sane pinih mabuat patut laksanayang cening ngawit mangkin :Nanem sarwa tumuwuh ring wewidangan pekarangan sekolah Mangda sekolahe kanten becik lan asri, taler mangda

Sekolahe madue’’ green hours’’( rumah hijau)

Ketua Osis :’’Inggih suksma guru, ngawit mangkin titiang jagi rauhin Sameton titiang para sisiane sami mangda makta bibit-bibit (entik- entikan) tarune sane langka mangda nenten punah.