Geguritan Sampik Ingtai ngawit kakawi duk rahina Redité Umanis tanggal 16 Januari 1915 olih Ida KetutS ari.
Geguritan puniki sampun lumrah kauningin antuk parajana Baliné, duaning sering kanggén lelampahan
sajeroning unen-unén minakadi arja, perémbon, drama gong, miwah sané lianan.
Sajaba punika Geguritan Sampik Ingtai sering kawacén sajeroning mabebasan antuk sekaa pasantian
sajebag jagat Bali. Punika mawinan para siswané patut uning ring daging ceritanipun, taler kaaptiang mangda
prasida nembangang pupuh-pupuh sané ngwangun geguritan punika.
Kacrita wenten kocap anak lanang mapangkat mayor, magenah ring Waciu Negari, maderbé pianak bajang
adiri, Nyonyah Ingtai. Ni Nyonyah mamanah jagi masekolah ring Angciu Negari. Nénten pisan ipun kawéhin
nglanturang masekolah, duaning genahé doh saha ipun madéwek istri. Duaning meled pisan nglanturang
masekolah, metu manahipuné nyineb raga mabusana kadi anak lanang, rambutnyané kacukur, nganggén topi,
saha maclana panjang.
Ring tengahing pamargi, ipun kacunduk sareng anak lanang saking Bociu Negari, mawasta I Babah
Sampik. Tetujonnyané pateh jagi nglanturang masekolah ring Angciu Negari. Irika sang kalih mapinta tangan
saha makenalan, raris sinarengan nyujur genah sekolahané. Gelising cerita, sampun reké sang kalih katerima
dados siswa irika, mawinan sahasa ngrereh dunungan. Sang kalih nyéwa kamar wantah asiki, kanggén genah
sirep sareng kalih.
Ni Nyonyah Ingtai marasa rikuh duaning ipun madéwék istri makalihan sareng anak lanang kadi I Babah
Sampik. Punika mawinan ipun ngwatesin genah sirep antuk sabuk, raris ngamedalang uwar-uwar, "Sapasira ja
nglintangin sabuk punika, pacang keni danda marupa kertas, dawet, miwah mangsi" (serana nulis) duk punika.
Sasampun makudang-kudang rahina, Ni Nyonyah keni danda duaning ipun nimpahin I Babah Sampik.
Nénten kawilangin suéné sang kalih masuitra, sirep sareng-sareng, masekolah sareng-sareng, malancaran
sareng-sareng sakadi anak masemeton. Riantuk sampun rumaket pisan pasuitrané, Ni Nyonyah waneh nyineb
raga duaning sayan tumbuh rasa tresna asih ring I Babah. Irika raris ipun nyinahang raga, mungguing sujatiné
ipun madéwék istri sané nyineb raga mabusana lanang.
I Babah Sampik engsek, nyelsel déwék duaning nénten pisan maderbé rasa sangsaya ring manah, saha
sampun sué pisan sirep sareng anak istri. Nénten asué, I Babah Sampik ngwiwitin mapajar, mungguing ipun
sampun banget kalulutan, tresna asih ring Ni Nyonyah. Ni Nyonyah taler asapunika, sampun saking sué ipun
maderbé manah lulut asih ring I Babah Sampik.
Durung puput sang kalih mabaosan, raris rauh utusan saking reramanipun, sané mawasta I Congliwat
mangda Ni Nyonyah sahasa budal ka Waciu Negari. Duaning kalintang bendu tur brangti, I Sampik polih
marebat sareng I Congliwat, nanging prasida kaandeg antuk Ni Nyonyah Ingtai.
Ni Nyonyah mapamit saha nunas mangda digelis I Babah Sampik mamadik déwékipuné ka Waciu Negari.
Ping tiga Ni Nyonyah majarang mangda ipun kapadik malih dasa rahinané, nanging I Sampik nampénin malih
tigang dasa rahina.
Kacrita rauh reké I Babah Sampik saha kulawarga mamadik Ni Nyonyah ka Waciu Negari. Sakéwanten
Ni Nyonyah nenten nampénin saha nundung I Babah, riantuk ipun kabaos nitia wecana, linyok ring semaya,
sampun telat kalih dasa rahina. Budal 1 Babah Sampik nyelsel déwék, nyakit ati, raris ipun padem.
Lanturan ceritané, kabaosang mungguing sang kalih sida macunduk ring sunia loka. Ri kalaning Ni
Nyonyah ngamargiang pawiwahan sareng I Bandar Macun, ring pamargi ipun tedun mabakti ajebos ring
kuburan I Babah Sampiké. Kacrita kuburan punika belah, raris Ni Nyonyah ical, ngranjing ring kuburan.
Para kulin I Bandar Macuné sahasa ngalgal kuburan punika, nanging Ni Nyonyah nénten kakeniang. Wenten
kocap cihna kekupu makalihan metu saking kuburan punika saha makeber nincap suargaloka. Kacritayang
atman sang kalih nemu bagia, rauh ring meru tumpang salikur, kaayahin antuk watek widiadariné.
0 Komentar