TERIMAKASIH SUDAH MANGUNJUNGI BLOG JULDWIPAESCMART, JULDWIPAESCMART TEMPAT BERBAGI MATERI BAHASA BALI SERTA BERBAGAI INFORMASI FOREX , MODEL/STRATEGI PEMBELAJARAN, KARYA ILMIAH,TIPS, APLIKASI SERTA PENGALAMAN HIDUP PENULIS
 |
| MATERI SEMBRAMA WACANA |
Sakadi panglimbak pangajahan Basa Bali ring aab jagaté mangkin rumasa
ngancan ngamecikang. Basa Bali sampun ngancan makéh sané ngawigunayang, nénten
ring wewidangan informal kématen. Silih tunggil kawagedan sané kaplajahin
ring widang pendidikan formal wantah kawagedan mabasa
Bali, inggih punika sembrama wacana. Sembrama wacana punika wantah babaosan sané
kawedar pinaka panyanggra sajeroning wénten acara. Sembrama wacana ketah kabaos sambutan
ring basa Indonesia. Ritatkala ngawéntenin acara majanten panyanggra sané utama inggih
punika antuk babaosan sané kabaos Sembrama Wacana, antuk punika dahat mabuat para
sisyané uning indik tata cara ngaturang Sembrama Wacana.
Malarapan tatacara ngwedar, sembrama wacana
kabinayang dados tetiga :
1.
Sembrama wecana tutur (lisan) mateges nyembrama
tamiu antuk bebaosan lisan, nenten ngwacen naskah.
Upami : - nyanggra
tamiu undangan resepsi
-mapaica piteket ring sang mawiwaha
2. sembrama wecana sasuratan (membaca teks)
mateges ngwedar daging pikayunan pinaka panyanggra tamiu malarapan ngwacen
naskah.
Upami :- baos Bupati duk acara ngenteg linggih
ring pura puseh
- baos Kadis Dikbud ring pamungkahan sarasehan mabasa bali
3. sembrama wecana ardatur (
memakai skema ) mateges ngwedar baos panyanggra malarapan ngwacen
bantang-bantang bebaosan pinaka skema
Upami : -
baos kelian truna nuntun parum indik bazzar
-baos jero bendesa ring paruman
desa adat
Struktur
Sembrama Wecana
1.
Pamahbah/Purwaka:-
a)
pangastawa/pangastuti (ketah nganggen panganjali
umat ),
b)
matur pangayubagia,panyuksma,swasti prapta ring
sang sane rauh,
c)
nyinahang angga sang mabaos ( perkenalan diri).
2.
Daging Sembrama Wecana:
Upami : indik resepsi
pawiwahan,wantiwarsa,ngenteg linggih msl…
3.
Pamuput Sembrama Wecana :
a)
nyutetang daging baos
b)
nunas agung pangampura,
c)
salam pamuput ( parama santih ).
Contoh Sembrama Wecana :
SAMBRAMA WECANA
SANG YADNYAMANA
Sembrama Wecana
ring Pawiwahan
Om Swastyastu,
o
Ida Pedanda Gdé Nyoman Jelantik
Dwaja sang maraga suci sané dahat suciang titiang.
o
Bapak Camat Drs. I Wayan Ardika,
M.Si., sané wangiang titiang.
o
Bapak Prebekel Désa Tista sane kusumayang titiang.
o
Kliang Banjar Tista Gedel ,sine
singgihang titiang.
o
Ida Dané para sameton uleman
lanang istri duuran alitan sané tresna asihin titiang.
Maka purwaning atur, lugrayang
titiang ( nama) pinaka sang madrebé karya yadnya ngaturang angayubagia pisan
majeng ring Ida Sang Hyang Widhi Wasa, santukan sampun majanten sangkaning
asung kertha wara nugrahan Ida, ring kawentenanne sakadi mangkin Ida Dané
sareng sami prasida mapupul iriki aturin titiang ngupasaksi miwah ngastitiang
upacara pawiwahan sang sané pacang alaki-rabi, mogi-mogi sang kalih prasida
lanus kapungkur wekas, rahayu sidaning don sakadi pangaptiné.
Ida Dané miwah sameton sareng
sami sané wangiang titiang.
Maka atur panyembraman titiang,
pinih riin titiang ngaturang dahat suksmaning manah antuk sapangrauh Ida Dané
sameton sareng sami, duaning sampun prasida nagingin mungguing atur pinunas
titiang malarapan antuk séwala patra sané sampun katur ring Ida Dane sameton
sareng sami. Tiosan ring punika, titiang nénten lali taler nglungsur agung rena
pangampura antuk kawéntenan titiang sapuniki, sampun majanten genah payadnyan
titiang kosekan sapunika taler banget titiang tuna miwah kirang ring sajeroning
nyanggra Ida Dané sameton sareng sami, punapi malih antuk genah titiang puniki
nénten nganutin tata linggih sané becik, tiosan ring punika ri tatkala titiang
mapangiring taler wénten atur titiang kalintang kaon nénten prasida nganutin
basa basita sané becik miwah patut.
Ring subha déwasa sané
mangkin, patut atur uningayang titiang mangda para undangan pawikan, mungguing
sang sané jagi mawiwaha mangkin, ipun sané kapurusa mawasta I Made Kembar, ipun
sané mangkin makarya pinaka guru honorér ring SMK N 2 Denpasar, alaki rabi ring
ipun sané predana mawasta Ni Komang Putri ipun pinaka pagawai swasta.
Mungguing pamargi yadnya sané
sampun kamargiang pinaka bebacakan manut Grhasta Asrama inggih punika
kapertama, sampun ngamargiang dharma suaka ring kulawarga wadoné, raris pitung
rahina sané lintang sampun taler ngmargiang papadikan, wusan punika kamargiang
upacara makalan-kalan, raris ring rahinané sané mangkin, rahina Soma Umanis
wuku Sungsang, pinanggal kaping pitu, tanggal 18 wulan Maret warsa 2022 pacang
kalaksanayang upacara widhiwidana, makacihna ngadegang Sang Hyang Semara Ratih
mangda sang kalih prasida kadirgayusan ngwangun pumahan, mawinan prasida
ngembasang pratisentana, putra-putri sané sadu gunawan. Pamargi sané pamuput
raris majauman, masuksma ngiket pakulawargan sang kalih maduluran antuk
makta tipat bantal ring kulawarga predana. Wusan punika puput
sampun sapulah-palih ri sajeroning upacara manusa yadnya titiang manut sekala
miwah niskala inggian sampun ngamargiang Tri Upaksaksi, minakadi Déwa Saksi,
Butha Saksi, miwah Manusa Saksi.
Ida Dané miwah sameton sareng
sami sané wangiang titiang.
Kasapunika indik Upacara Manusa
Yadnya sané kamargiang, mogi-mogi sapangrauh Ida Dané sameton sareng sami, ri
tatkala nyaksiang maduluran ngrastitiang sané becik, prasida raris ipun sang
kalih manggihin karahayuan.
Sadurung titiang muputin atur,
Ida Dane sareng sami aturin titiang mangda masandekan riin duaning jagi
katuran anyita bhoga samatra. Inggih wantah sakadi asapunika mungguing atur
panyembraman titiang, manawi ta wénten kirang langkung antuk titiang matur,
titiang nunas pangampura. Makawesananing atur puputin titiang antuk parama
santih.
Om Santih, Santih, Santih, Om.
A.
INDAYANG SAURIN
PITAKEN RING SOR!
1.
Manut sambrama wacana ring ajeng,
napi ke sane dados unteng bebaosan ring sambrama wacana punika, indayang telatarang!
Pasaur:
................................................................................................................................................................................................................................................................................................
2.
Sapunapi paiketan para uleman sareng sang madue karya punika yening selehin
ring daging sambrama wacana punika?
Pasaur:
................................................................................................................................................................................................................................................................................................
3.
Napike pikenoh ngawentenang upacara pawiwahan?Indayang telatarang!
Pasaur: ................................................................................................................................................................................................................................................................................................
4.
Sapa sira pesengan sang alaki rabi saking purusa punika?
Pasaur:
................................................................................................................................................................................................................................................................................................
5.
Manut sambrama wacana ring ajeng ring dijake genah kalaksanayang
upacara pawiwahan punika?
Pasaur: ................................................................................................................................................................................................................................................................................................
B. INDAYANG MAKARYA
TEKS SAMBRAMA WACANA WANTI WARSA
SEKA TRUNA !
0 Komentar